ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول تولەكباەۆ ءسابيىن كوتەرىپ، كۋرەر بولىپ جۇمىس ىستەگەن ايەلدىڭ وتباسى الماتىدان كوشىپ كەتكەنىن مالىمدەدى. بۇل تۋرالى سەنات كۋلۋارىندا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول تۇياقباي ايتتى، دەپ حابارلايدى "ادىرنا".
ۆيتسە-ءمينيستردىڭ ايتۋىنشا، جەلىدە جازبا جاريالعاننان كەيىن الماتى قالاسىنىڭ الەۋمەتتىك قورعاۋ باسقارماسى وتباسىمەن جەدەل بايلانىسىپ، كومەك ۇسىنعان.
«بۇل جازبا شىققان بويدا الماتى قالاسىنىڭ الەۋمەتتىك قورعاۋ باسقارماسى دەرەۋ ىسكە كوشتى. ولاردىڭ ۇيىنە بارىپ، جۇمىسقا ورنالاستىرۋ بويىنشا ۇسىنىستار جاسالدى. الايدا وتباسى ودان باس تارتتى»، – دەدى ەربول تۇياقباي.
ۆيتسە-مينيستر كەيىنىرەك وتباسىنىڭ ءوز ەركىمەن الماتىدان كوشىپ، قازىرگى ۋاقىتتا شىمكەنت قالاسىندا تۇرىپ جاتقانىن ايتتى.
«ولار الماتى قالاسىنان ءوز ەركىمەن كوشىپ كەتتى. قازىر بۇرىن ءومىر سۇرگەن جەرى – شىمكەنتتە تۇرىپ جاتىر. ەشقانداي قىسىم بولعان جوق. بۇل شەشىمدى اتا-انالارىمەن اقىلداسا وتىرىپ، وزدەرى قابىلداعان. نەلىكتەن كوشكەنىن بىلمەيمىز. بۇل – وتباسىنىڭ جەكە شەشىمى. مۇمكىن اتا-اناسى قايتا شاقىرعان بولار. بىراق كەشە عانا ناقتىلاپ سۇراستىردىم، شىمكەنت قالاسىنىڭ الەۋمەتتىك قورعاۋ باسقارماسى بۇل اقپاراتتى راستادى. ەشقانداي قىسىم كورسەتىلمەگەن»، – دەپ قوستى ۆيتسە-مينيستر.
ايتا كەتەيىك، وسىعان دەيىن جەلىدە الماتى كوشەلەرىندە ءسابيىن كوتەرگەن انانىڭ كۋرەر بولىپ جۇرگەن سۋرەتى جاريالانعان بولاتىن.
