باتىس قازاقستان وبلىسىنداعى ەڭ كونە ۆوكزال عيماراتى ءسۇرىلىپ، جاڭادان سالىندى.
تاسقالا اۋدانىنداعى سەميگلاۆىي مار ستانتسياسىنىڭ 110 جىلدىق تاريحى بار. جاڭادان سالىنعان نىسان سالتاناتتى تۇردە پايدالانۋعا بەرىلدى. وعان ايماق باسشىسى ناريمان تورەعاليەۆ، بقو ءماسليحات دەپۋتاتارى، «قازاقستان تەمىر جولى» ۇك» اق اقتوبە ماگيسترالدى جەلى بولىمشەسى ديرەكتورىنىڭ ءبىرىنشى ورىنباسارى جايلاۋباي سەرعالي، وبلىستىق ارداگەرلەر كەڭەسىنىڭ توراعاسى ماقسوت بەرگەن قاتىستى.
وبلىس اكىمى ناريمان تورەعاليەۆ مەملەكەت باسشىسى قاسىم-جومارت توقاەۆتىڭ تەمىرجول ينفراقۇرىلىمدارىن دامىتۋ جونىندەگى تاپسىرماسىنا سايكەس قولعا الىنعان جوبانىڭ ماڭىزىنا توقتالدى.
- پرەزيدەنت تاپسىرماسىنا سايكەس ءبىز نەگىزگى كولىك نىساندارىن جاڭارتۋ بويىنشا كەشەندى جۇمىستى اياقتاي كەلدىك. بۇل جولاۋشىلاردىڭ جاعدايىن جاقسارتىپ قانا قويماي، وبلىس ەكونوميكاسى مەن لوگيستيكاسىنىڭ دامۋىنا دا سەپتىگىن تيگىزەدى»، دەدى ناريمان تورەعاليەۆ.
سەميگلاۆىي مار بەكەتى ارقىلى كۇنىنە 2 پويىز قاتىنايدى. ستانتسيا سالىنعالى ءجىبى ءتۇزۋ جوندەۋ كورگەن جوق. ماڭىزدى نىساننىڭ جاڭعىرتىلۋى جولاۋشىلار ءۇشىن جايلى جاعداي جاساپ قانا قويماي، وبلىس ەكونوميكاسى مەن لوگيستيكاسىن دامىتۋعا تىڭ سەرپىن بەرەدى.
جوبا اياسىندا ستانتسيا ءسۇرىلىپ، جاڭادان سالىندى. زاماناۋي كۇتۋ زالدارى جاساقتالىپ، جاڭارتىلعان ناۆيگاتسيا جانە اقپاراتتاندىرۋ جۇيەلەرى ورناتىلدى. عيماراتتىڭ ساۋلەتى قازىرگى زامانعا لايىقتالىپ، اينالاسى اباتتاندىرىلدى.
ايتا كەتەيىك، بىلتىر وڭىردە 419 مىڭ جولاۋشى پويىزبەن قاتىناعان. تەمىرجول ارقىلى 5 ملن توننا جۇك تاسىمالدانعان.
