وزبەكستاندا اي-92 ماركالى بەنزيننىڭ بيرجاداعى باعاسى تاريحي ەڭ جوعارى دەڭگەيگە كوتەرىلدى. 29 ماۋسىمداعى ساۋدا قورىتىندىسى بويىنشا ءبىر توننا اي-92 بەنزينى 13,919 ملن سۋمعا ساتىلعان. بۇل تۋرالى spot.uz جاريالادى، دەپ حابارلايدى "ادىرنا".
اقپاراتقا سايكەس، سوڭعى ساۋدا ناتيجەسى الدىڭعى كورسەتكىشتەن 1,1%-عا جوعارى. جالپى ماۋسىم ايىنىڭ باسىنان بەرى بەنزين باعاسى 1,473 ملن سۋمعا، ياعني 11,8%-عا وسكەن.
باعانىڭ نەگىزگى ءوسىمى ايدىڭ العاشقى جارتىسىندا تىركەلدى. ماسەلەن، 4 ماۋسىمدا ءبىر توننا اي-92 بەنزينى 12,476 ملن سۋم بولسا، نەبارى ءتورت كۇننەن كەيىن، 8 ماۋسىمدا ونىڭ قۇنى 13,788 ملن سۋمعا جەتىپ، 10,5%-عا قىمباتتاعان.
ودان كەيىنگى ەكى اپتا بويى بەنزين باعاسى 13,7–13,8 ملن سۋم ارالىعىندا تۇراقتاعانىمەن، 29 ماۋسىمدا قايتا ءوسىپ، جاڭا رەكورد ورناتتى.
ساراپشىلاردىڭ پىكىرىنشە، باعانىڭ كوتەرىلۋىنە نارىقتاعى ۇسىنىستىڭ ازايۋى اسەر ەتۋى مۇمكىن. ەگەر 1 ماۋسىمدا بيرجاعا 3 791 توننا بەنزين شىعارىلسا، 23 ماۋسىمعا قاراي بۇل كولەم 1 898 تونناعا دەيىن قىسقارعان. ال 29 ماۋسىمدا ۇسىنىس 3 123 تونناعا دەيىن قايتا ارتقانىمەن، بۇل باعانىڭ تومەندەۋىنە ىقپال ەتە المادى.
Spot باسىلىمى وزبەكستانداعى جاعدايدى رەسەيدەگى جانارماي تاپشىلىعىمەن بايلانىستىرادى. مالىمەتكە سايكەس، رەسەيدە مۇناي وڭدەۋ زاۋىتتارىنداعى جوسپاردان تىس جوندەۋ جۇمىستارى جانارماي تاپشىلىعىن كۇشەيتكەن. بۇعان ۋكراينا دروندارىنىڭ شابۋىلىنان كەيىنگى احۋال سەبەپ بولعانى ايتىلادى.
ەسكە سالايىق، رەسەي 1 ساۋىردەن باستاپ بەنزين ەكسپورتىنا ۋاقىتشا شەكتەۋ ەنگىزگەن. ساراپشىلار بۇل شەشىم باعانىڭ ودان ءارى كۇرت ءوسۋىنىڭ الدىن الۋى مۇمكىن ەكەنىن ايتقانىمەن، نارىقتاعى باعانى قىسقا مەرزىمدە تومەندەتۋى ەكىتالاي دەپ باعالاپ وتىر.
