فوتو: PLAMEN PRESS
ازەربايجاننىڭ كورنەكتى جازۋشىسى اكرام ايليسلي ەۋروپالىق قايتا قۇرۋ جانە دامۋ بانكىنىڭ (ەقدب) 2026 جىلعى ادەبي سىيلىعىنا يە بولدى. جازۋشى بۇل ماراپاتتى كەڭەس داۋىرىندە جازىلعان، الايدا اعىلشىن تىلىنە جاقىندا عانا اۋدارىلىپ جارىق كورگەن «ادامدار مەن اعاشتار» تريلوگياسى ءۇشىن الدى. بۇل تۋرالى ۆۆس جازدى، دەپ حابارلايدى “ادىرنا”.
بيىلعى بايقاۋدىڭ فينالىندا ءۇش اۆتور باق سىنادى. ولاردىڭ قاتارىندا پولياك فانتاست-جازۋشىسى ياتسەك دۋكايدىڭ «مۇز» رومانى مەن مىسىرلىق قالامگەر شادي ءليۋيستىڭ «گرينۆيچ سىزىعىندا» اتتى شىعارماسى بولدى. قازىلار القاسى جەڭىستى اكرام ءايليسليدىڭ ەڭبەگىنە لايىق دەپ تانىدى.
«ادامدار مەن اعاشتار» تريلوگياسى ەكىنشى دۇنيەجۇزىلىك سوعىس جىلدارىنداعى كەڭەستىك ازەربايجاننىڭ تاۋلى اۋىلىنداعى ءومىردى بالانىڭ كوزىمەن باياندايدى. شىعارمادا ەر ازاماتتاردىڭ مايدانعا اتتانۋىنان كەيىنگى اۋىل تۇرمىسى، ايەلدەردىڭ اۋىر ەڭبەگى مەن سوعىس كەزەڭىندەگى ادامداردىڭ تاعدىرى شىنايى سۋرەتتەلەدى.
قازىلار القاسىنىڭ ءتورايىمى مايا ياگگي شىعارمانىڭ كوركەمدىك ەرەكشەلىگىن جوعارى باعالاپ، كەترين ە. يانگتىڭ اعىلشىن تىلىندەگى اۋدارماسى كىتاپتىڭ اتموسفەراسىن، كەيىپكەرلەر الەمىن جانە بالالىق شاقتىڭ اسەرلى كورىنىستەرىن شەبەر جەتكىزگەنىن اتاپ ءوتتى.
اۋدارماشى كەترين ە. يانگتىڭ ايتۋىنشا، شىعارمادا سوعىس، اشتىق، ەكولوگيالىق ماسەلەلەر جانە تۇرمىستىق زورلىق-زومبىلىق سياقتى كۇردەلى تاقىرىپتار قوزعالعانىمەن، اۆتوردىڭ پروزاسى ءۇمىت پەن ادامگەرشىلىككە تولى. ونىڭ پىكىرىنشە، شىعارمانى اۋدارۋ ۇلكەن شىعارماشىلىق تاجىريبە بولعان.
اكرام ءايليسليدىڭ تاۋەلسىز ازەربايجان كەزەڭىندەگى تاعدىرى كۇردەلى ءوربىدى. 2012 جىلى جارىق كورگەن «تاس تۇستەر» («كامەننىە سنى») شىعارماسىنان كەيىن جازۋشى مەملەكەتتىك ماراپاتتارىنان ايىرىلىپ، قوعام تاراپىنان قاتتى سىنعا ۇشىراعان ەدى. ونىڭ كىتاپتارى ورتەلىپ، وزىنە قاتىستى قىلمىستىق ءىس قوزعالدى. قازىرگى ۋاقىتتا 88 جاستاعى قالامگەر باكۋدە ءىس جۇزىندە ۇيقاماق جاعدايىندا ءومىر ءسۇرىپ جاتىر.
2025 جىلدىڭ اقپانىندا اۋدارماشى كەترين ە. يانگ پەن كاۆكاز ماسەلەلەرى بويىنشا ساراپشى توم دە ۆاال جازۋشىمەن كەزدەسكەن. ايليسلي بۇل ماراپاتتىڭ ءوزى ءۇشىن كۇتپەگەن قۋانىش بولعانىن ايتىپ، ونى ازەربايجان ادەبيەتىنىڭ حالىقارالىق دەڭگەيدە مويىندالۋىنىڭ بەلگىسى دەپ باعالادى.
ەقدب ادەبي سىيلىعىنىڭ جالپى جۇلدە قورى – 20 مىڭ ەۋرو. بۇل قاراجات اۆتور مەن اۋدارماشى اراسىندا تەڭ بولىنەدى. فينالعا شىققان وزگە اۆتورلار مەن ولاردىڭ اۋدارماشىلارىنا 2 مىڭ ەۋرودان بەرىلەدى.
ەۋروپالىق قايتا قۇرۋ جانە دامۋ بانكىنىڭ ادەبي سىيلىعى 2018 جىلدان بەرى تابىستالىپ كەلەدى. ول بانك ينۆەستيتسيا سالاتىن ەلدەردىڭ انا تىلىندە جازىلىپ، سوڭعى ءبىر جىل ىشىندە اعىلشىن تىلىندە جارىق كورگەن ۇزدىك ادەبي شىعارمالاردى ماراپاتتاۋعا ارنالعان.
