فوتو: يزۆەستيا/ەدۋارد كورنيەنكو
ماسكەۋدەگى حوروشەۆ اۋداندىق سوتى رەسەيدىڭ ازاماتتىق اۆياتسيا جونىندەگى فەدەرالدىق اگەنتتىگىنىڭ (روساۆياتسيا) بۇرىنعى باسشىسى الەكساندر نەرادكونى الاياقتىق ءىسى بويىنشا قاماۋعا الۋ تۋرالى شەشىم شىعاردى. بۇل تۋرالى سوت پروتسەسىنە قاتىسۋشىلاردىڭ ءبىرى تاسس اگەنتتىگىنە ايتقان، دەپ حابارلايدى “ادىرنا”.
ونىڭ ايتۋىنشا، سوت تەرگەۋ ورگاندارىنىڭ نەرادكونى اسا ءىرى كولەمدەگى الاياقتىق جاسادى دەگەن ايىپپەن (رەسەي قىلمىستىق كودەكسىنىڭ 159-بابىنىڭ 4-بولىگى) قاماۋدا ۇستاۋ تۋرالى ءوتىنىشىن قاناعاتتاندىرعان.
دەرەككوزدىڭ مالىمەتىنشە، قىلمىستىق ءىس مەملەكەتتىك كەلىسىمشارتتارعا بايلانىستى قوزعالعان.
حوروشەۆ اۋداندىق سوتىنىڭ ەلەكتروندى بازاسىندا جاريالانعان اقپاراتقا سايكەس، الەكساندر نەرادكو وزىنە قاتىستى شىعارىلعان قاماۋعا الۋ تۋرالى شەشىمگە شاعىم تۇسىرگەن.
الەكساندر نەرادكو روساۆياتسيانى 2009 جىلدان بەرى باسقارعان. ول 2023 جىلى قىزمەتىنەن بوساتىلعان بولاتىن. سول كەزدە دەرەككوزدەر ونىڭ كەيىننەن «نورنيكەل» كومپانياسىنا جۇمىسقا اۋىسۋدى جوسپارلاعانىن حابارلاعان.
