اقش-تىڭ بۇرىنعى پرەزيدەنتى دجو بايدەننىڭ ۇلى حانتەر بايدەن دونالد ترامپتى نوبەل بەيبىتشىلىك سىيلىعىنا «ۇسىناتىنىن» مالىمدەپ، ونىڭ سىرتقى ساياساتقا قاتىستى مالىمدەمەلەرىن ءاجۋالادى. بۇل تۋرالى 2 شىلدە كۇنى حانتەر بايدەن X الەۋمەتتىك جەلىسىندەگى رەسمي پاراقشاسىندا جازدى، دەپ حابارلايدى “ادىرنا”.
جازبادا ول ترامپتىڭ يرانمەن اراداعى قاقتىعىستى بىرنەشە مارتە «توقتاتقانى» يرونيالىق سارىندا سيپاتتالعان.
«مەن دونالد ترامپتى نوبەل بەيبىتشىلىك سىيلىعىنا رەسمي تۇردە ۇسىنامىن. تاريحتا ەشبىر پرەزيدەنت ءبىر سوعىستى وسىنشاما رەت اياقتاعان ەمەس. CNN مالىمەتىنشە، ول يرانمەن قاقتىعىستى كەمىندە 38 رەت توقتاتقان. بۇل – نوبەل كوميتەتىنىڭ نازارىن اۋدارۋعا لايىق رەكورد»، – دەپ جازدى ول.
جاريالانىم قىسقا ۋاقىت ىشىندە 6,8 ميلليوننان استام قارالىم جينادى.
بۇل جازبا ارقىلى حانتەر بايدەن دونالد ترامپتىڭ تاياۋ شىعىستاعى جاعدايعا قاتىستى بىرنەشە مارتە جاساعان وپتيميستىك مالىمدەمەلەرىن كەلەكە ەتكەن. بۇعان دەيىن CNN ارناسى ترامپتىڭ سوزدەرى مەن الەۋمەتتىك جەلىدەگى جاريالانىمدارىنا تالداۋ جاساپ، ونىڭ يرانمەن قاقتىعىس ءىس جۇزىندە اياقتالدى نەمەسە بەيبىت كەلىسىم جاقىن دەگەن مازمۇنداعى پىكىردى كەمىندە 38 رەت ايتقانىن حابارلاعان.
حانتەر بايدەن جازباسىنىڭ سوڭىن ترامپ ءجيى قولداناتىن «وسى ماسەلەگە نازار اۋدارعاندارىڭىز ءۇشىن راقمەت» دەگەن تىركەسپەن اياقتاپ، مىسقىلىن ودان ءارى كۇشەيتكەن.
ازىرگە دونالد ترامپ نەمەسە ونىڭ كومانداسى بۇل جازباعا قاتىستى پىكىر بىلدىرگەن جوق.
وسى ۋاقىتتا الەمدىك مۇناي نارىعىندا دا وزگەرىستەر بايقالدى. اقش پەن يران اراسىنداعى قارىم-قاتىناستىڭ جاقسارۋى مۇمكىن دەگەن ءۇمىت اياسىندا Brent ماركالى مۇناي باعاسى سوڭعى بىرنەشە ايداعى ەڭ تومەنگى دەڭگەيلەردىڭ بىرىنە ءتۇستى. لوندونداعى ICE بيرجاسىندا قىركۇيەك ايىنداعى Brent فيۋچەرستەرىنىڭ باعاسى 1,1 پايىزعا تومەندەپ، ءبىر باررەلى 70,78 دوللاردى قۇرادى.
