قازاقستان پرەزيدەنتى نۇرسۇلتان نازارباەۆ امەريكا قۇراما شتاتتارىنا رەسمي ساپارىنىڭ قورىتىندىسى بويىنشا ءباسپاسوز ءماسليحاتىندا دونالد ترامپپەن وتكەن كەزدەسۋى جايلى ايتىپ بەردى.
"بارلىعى دا، ءبىز دە ءوزىمىز كەزدەسكەن كەزدە ءبىر-بىرىمىزگە قۇرمەت كورسەتەمىز. مەنى اق ۇيگە شاقىرعاندارى ءۇشىن العىس ءبىلدىردىم. ول ماعان كەلگەنىم ءۇشىن العىس ايتتى. اق ءۇيدىڭ ىشىنە كىرگەن سوڭ ول مەنى بارلىق دەلەگاتسيامەن تانىستىردى. سودان ءبىز جەكە اڭگىمەلەسۋ ءۇشىن ءبىر كابينەتكە كىردىك. بىراق مەن مۇندايدى ەشقاشان كورمەپپىن. قاسىمىزدا ءاردايىم ادامدار بولدى. بىراق كەيىن ەكەۋىمىز وتىرىپ اڭگىمەلەستىك. كەيىنىرەك دەمالاتىن بولمەگە باردىق. تاعى دا اڭگىمەلەستىك. سوسىن قوشتاسىپ، ءبىر-بىرىمىزگە ساتتىلىك پەن دەنساۋلىق تىلەدىك", - دەدى قر پرەزيدەنتى.
سونداي-اق، مەملەكەت باسشىسى اقش پەن رەسەي اراسىنداعى قارىم-قاتىناستىڭ ناشارلاعانىن ايتىپ ءوتتى.
"بۇگىندە اقش پەن رەسەيدىڭ قارىم-قاتىناسى ناشار. بۇدان ەشكىمگە دە جاقسى بولمايدى. رەسەي ءبىزدىڭ كورشى، سەرىكتەس، وداقتاس. رەسەيمەن ساۋدا جونىندەگى ۇلكەن كەلىسىمشارتتار جاسالدى. دونالد ترامپپەن وسى جايلى دا سويلەستىك", - دەدى نازارباەۆ.
وسى رەتتە مەملەكەت باسشىسى اقش پرەزيدەنتىمەن دە رەسەي فەدەراتسياسىنا قاتىستى سانكتسيالار ماسەلەلەسىن تالقىلاعاندارىن ايتتى.
ء"بىز وسى جايلى سويلەستىك. (...) مەنىڭشە، بۇل ماسەلە ءالى شەشىلەدى(...)", - دەپ سەنىم ءبىلدىردى قازاقستان پرەزيدەنتى.
وسىعان دەيىن نازارباەۆتىڭ بۇۇ قاۋىپسىزدىك كەڭەسى وتىرىسىندا مالىمدەمە جاساعانى حابارلانعان بولاتىن. "مۇمكىندىكتى پايدالانا وتىرىپ، پرەزيدەنت دۋدانى پولشانىڭ بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قىزمەتىنىڭ باستالۋىمەن قۇتتىقتايمىن. (...) جاھاندىق ۇيىمنىڭ وسى ماڭىزدى ورگانى اياسىندا ىنتىماقتاستىق پەن ىقپالداستىق تانىتىپ، بىرلەسە جەمىستى جۇمىس ىستەيمىز دەپ ۇمىتتەنەمىن", - دەگەن ەدى قازاقستان پرەزيدەنتى.
ەسكە سالا كەتەيىك، نۇرسۇلتان نازارباەۆ اقش-قا رەسمي ساپارمەن 16 قاڭتاردا بارعان بولاتىن.
قازاقستان پرەزيدەنتى اقش-تىڭ رەسمي وكىلدەرىمەن كەزدەسۋ وتكىزەدى دەپ جوسپارلانعان. سونداي-اق، نازارباەۆتىڭ 18 قاڭتارعا بەلگىلەنگەن بۇۇ قاۋىپسىزدىك كەڭەسىنىڭ قارۋ قولدانۋدى جاپپاي جويۋعا ارنالعان بريفينگكە قاتىساتىنى ايتىلادى. سونداي-اق، وسىعان دەيىن ساياساتتانۋشى ەرلان قارين نازارباەۆ پەن ترامپ كەزدەسۋىنىڭ ماڭىزدىلىعىن ايتقان ەدى. "يا، قازاقستان وڭىرلىك مەملەكەت بولىپ سانالادى، دەگەنمەن دە قازاقستان ءتۇرلى حالىقارالىق پىكىرتالاستارعا بەلسەندى تۇردە قاتىسىپ جاتىر. سوندىقتان دا ءبىزدىڭ پرەزيدەنتىمىزدىڭ امەريكا باسشىسىمەن كەزدەسۋى وسى ماسەلەنىڭ وزەكتىلىگىن ارتتىرۋعا مۇمكىندىك بەرەدى", - دەگەن ەدى ەرلان قارين.
tengrinews.kz
