اقش-تىڭ دجوردجيا شتاتىنداعى ۋورنەر-روبينس قالاسىنىڭ مەكتەبىندە اتىس بولدى، دەپ حابارلايدى «ادىرنا» ءتىلشىسى Associated Press-قا سىلتەمە جاساپ.
پوليتسيانىڭ مالىمەتىنشە، ءبىر توپ وقۋشى دارەتحانادا بولعان كەزدە توعىزىنشى سىنىپتىڭ ەكى وقۋشىسى اراسىندا سوزگە كەلىسپەۋشىلىك تۋىنداپ، ول توبەلەسكە ۇلاسقان. جانجال بارىسىندا جاسوسپىرىمدەردىڭ ءبىرى ەكىنشىسىنە وق اتقان. كۇدىكتى وقيعا ورنىنان قاشىپ كەتكەن.
مەكتەپكە بەكىتىلگەن پوليتسيا قىزمەتكەرى زارداپ شەككەن وقۋشىعا العاشقى مەديتسينالىق كومەك كورسەتىپ، قان توقتاتاتىن جگۋت سالعان. كەيىن ءجاسوسپىرىم اۋرۋحاناعا جەتكىزىلگەن. دارىگەرلەر ونىڭ ومىرىنە قاۋىپ ءتونىپ تۇرماعانىن ايتتى.
شامامەن ءبىر ساعاتتان كەيىن كۇدىكتى مەكتەپتەن 800 مەتر قاشىقتىقتاعى تۇرعىن اۋداننان ەش قارسىلىقسىز ۇستالعان.
«حيۋستون وكرۋگىندە ءبىز جىل سايىن دايىندالاتىن جاعدايلاردىڭ ءبىرى تىركەلدى. باقىتىمىزعا قاراي، سالدارى الدەقايدا اۋىر بولمادى. تەك ءبىر وقۋشى عانا زارداپ شەكتى»، – دەدى شەريف مەتت موۋلتون.
وقيعادان كەيىن مەكتەپ 13 جانە 14 تامىز كۇندەرى وقۋشىلار ءۇشىن جابىلدى. قازىر مەكتەپ قىزمەتكەرلەرى مەن بالالارعا پسيحولوگتار كومەك كورسەتىپ جاتىر.
