قاسىم-جومارت توقاەۆ اقش كونگرەسى وكىلدەر پالاتاسىنىڭ دەلەگاتسياسىن قابىلدادى. بۇل تۋرالى اقوردانىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
كونگرەسسمەندەر دجەيمس پانەتتا جانە توماس سۋوتستسيمەن كەزدەسۋدە قازاق-امەريكا قاتىناستارىن دامىتۋ پەرسپەكتيۆالارى تالقىلاندى. اقش كونگرەسىندەگى قازاقستاننىڭ دوستارى توبىنىڭ قىزمەتى اياسىندا پارلامەنتارالىق بايلانىستاردى نىعايتۋعا ەرەكشە نازار اۋدارىلدى.
«مەملەكەت باسشىسى اقش كونگرەسسمەندەرىنىڭ ساپارى پارلامەنتتىك ديپلوماتيانى ىلگەرىلەتۋ تۇرعىسىنان ماڭىزدى دەپ اتاپ ءوتتى. سونداي-اق ەكىجاقتى ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ قارقىندى دامىپ كەلە جاتقانىنا كوڭىلى تولاتىنىن جەتكىزدى»، – دەلىنگەن حابارلامادا.
سونداي-اق، پرەزيدەنت كونگرەسسمەندەرگە ەلىمىزدە جۇزەگە اسىرىلىپ جاتقان اۋقىمدى رەفورمالار مەن قازاقستان حالقىنا ارناعان جولداۋىنىڭ نەگىزگى باعىتى تۋرالى ايتىپ بەردى.
كونگرەسسمەندەر مەملەكەت باسشىسىنا كەزدەسۋ ءۇشىن العىس ايتىپ، پرەزيدەنتتىڭ اۋقىمدى ساياسي جانە ەكونوميكالىق رەفورمالاردى جۇزەگە اسىرۋداعى باستامالارىن جوعارى باعالادى.
”ادىرنا” ۇلتتىق پورتالى
