ۇلتتىق دومبىرا كۇنىنە وراي ۇلىتاۋ وبلىسىندا ۇلتتىق ونەردى ۇلىقتاعان اۋقىمدى مادەني ءىس-شارالار ءوتتى. وڭىردەگى اۋقىمدى ءىس-شارالاردىڭ ءبىرى ساتباەۆ قالاسىندا ۇيىمداستىرىلدى. قالا مەكتەپتەرىنەن جينالعان 2000 وقۋشى ءبىر مەزەتتە «بالبىراۋىن» كۇيىن ورىنداپ، ۇلتتىق ونەرگە دەگەن قۇرمەتتىڭ جارقىن ۇلگىسىن كورسەتتى. ءىس-شارانىڭ باستى ماقساتى – جاس ۇرپاقتىڭ بويىنا ۇلتتىق قۇندىلىقتاردى دارىپتەۋ، دومبىرانىڭ قادىر-قاسيەتىن ناسيحاتتاۋ جانە قازاقتىڭ كۇي ونەرىن كەڭىنەن تانىتۋ.
سونداي-اق وبلىس ورتالىعىندا ايتۋلى مەرەكەگە وراي ۇلتتىق ونەردىڭ ءورىسىن كەڭەيتكەن مازمۇندى كونتسەرتتىك باعدارلاما ۇيىمداستىرىلدى. ساحنا تورىندە كۇمبىرلەگەن كۇيلەر ورىندالىپ، شىعارماشىلىق ۇجىمدار مەن ونەرپازدار كورەرمەنگە ەرەكشە رۋحاني اسەر سىيلادى.
قاراجال قالاسىنىڭ كىتاپحانا قىزمەتكەرلەرىنىڭ باستاماشىلىعىمەن «ناعىز قازاق – دومبىرا» اتتى اقپاراتتىق كىتاپ كورمەسى ءوتتى. تانىمدىق كەزدەسۋگە قاتىسقان «بالداۋرەن» جازعى لاگەرىنىڭ تاربيەلەنۋشىلەرى دومبىرانىڭ شىعۋ تاريحى، قازاق حالقىنىڭ رۋحاني ومىرىندەگى ورنى جانە كۇي ونەرىنىڭ كورنەكتى وكىلدەرى تۋرالى تانىمدى ماعلۇمات الدى.
ۇلتتىق ونەردى دارىپتەگەن مەرەكەلىك باعدارلامالار ىشىندە جاڭاارقا اۋدانىندا ۇيىمداستىرىلعان ءىس-شارالار ايرىقشا ورىن الدى. تۇگىسكەن اۋىلىنىڭ ي.وماروۆ اتىنداعى مادەنيەت ءۇيى جانىنداعى «سەرپەر» دومبىرا ۇيىرمەسىنىڭ قۇرىلعانىنا 10 جىل تولۋىنا وراي مەرەكەلىك ەسەپ بەرۋ كونتسەرتى ءوتتى. كەش بارىسىندا جاس كۇيشىلەر قازاقتىڭ قاسيەتتى قارا دومبىراسىمەن كۇي شەرتىپ، كورەرمەننىڭ ىستىق ىقىلاسىنا بولەندى. اۋداندىق مادەنيەت ۇيىندە اۋدان ونەرپازدارى، دومبىراشىلار مەن مادەنيەت قىزمەتكەرلەرى قاتىستۋىمەن كونتسەرت ءوتتى.
سونىمەن قاتار ۇلىتاۋ اۋداندىق مادەنيەت ۇيىندە «ۇلتتىق دومبىرا – ۇلت مۇراسى» اتتى مەرەكەلىك ءىس-شارا ۇيىمداستىرىلدى. بۇل كۇنى ۇلىتاۋلىقتار قاسيەتتى قارا دومبىرانىڭ قوڭىر ءۇنى ارقىلى ۇلتتىق ونەرگە دەگەن قۇرمەتىن ايشىقتاپ، تاعىلىمدى كونتسەرتتىك باعدارلامانى تاماشالادى. كۇمبىرلەگەن كۇيلەر مەن رۋحتى اندەر كورەرمەنگە ەرەكشە اسەر سىيلاپ، ۇلتتىق قۇندىلىقتارعا دەگەن سۇيىسپەنشىلىكتى ارتتىرا ءتۇستى.
