يران تۇرعىندارى ەلدىڭ بۇرىنعى جوعارى كوشباسشىسى اياتوللا حامەنەيگە ارنالعان ازا تۇتۋ شارالارىنىڭ ءۇشىنشى كۇنى تەگەرانداعى باس مەشىتكە جينالدى، دەپ حابارلايدى «ادىرنا» ءتىلشىسى.
ازا تۇتۋ شارالارى وتكەن جۇمادا باستالعان بولاتىن. بەيسەنبى كۇنى حامەنەي تۋعان قالاسى مەشحەدتە يمام رەزا كەسەنەسىنىڭ اۋماعىندا جەرلەنبەك. بۇل – يرانداعى ەڭ ماڭىزدى زيارات ورىندارىنىڭ ءبىرى.
جەكسەنبىدەن باستاپ اياتوللانىڭ دەنەسىمەن قوشتاسۋ ءراسىمى تەگەرانداعى موساللا ۇلكەن مەشىتىندە ءوتىپ جاتىر.
جەكسەنبى كۇنى جەرلەۋ راسىمىنە حامەنەيدىڭ ءۇش ۇلى – ماسۋد، موستافا جانە مەيسام قاتىستى. ولار راسىمدە يران پرەزيدەنتى ماسۋد پەزەشكيانمەن جانە يسلام رەۆوليۋتسياسى ساقشىلار كورپۋسىنىڭ باسشىسى احماد ۆاحيديمەن بىرگە بولدى.
الايدا ولاردىڭ قاتارىندا تاعى ءبىر ۇلى – مۇراگەرى مودجتابا حامەنەي كورىنگەن جوق. باقىلاۋشىلاردىڭ پىكىرىنشە، بۇعان قاۋىپسىزدىك ماسەلەلەرى سەبەپ بولۋى مۇمكىن.
ءالي حامەنەيدىڭ قازاسىنان كەيىن مودجتابا حامەنەي يراننىڭ جوعارى كوشباسشىسى قىزمەتىنە كىرىسكەن ەدى. الايدا لاۋازىمعا تاعايىندالعاننان بەرى ول بىردە-ءبىر رەت كوپشىلىك الدىنا شىقپاعان. بۇل ونىڭ دەنساۋلىعىنا قاتىستى ءتۇرلى قاۋەسەتتىڭ تارالۋىنا سەبەپ بولدى.
مودجتابا حامەنەي اكەسى قازا تاپقان امەريكالىق-يزرايلدىك شابۋىل كەزىندە جارالانعان بولاتىن.
جاڭا جوعارى كوشباسشى اكەسىنىڭ جەرلەۋ راسىمىنە قاتىسا ما دەگەن سۇراق ازا تۇتۋ شاراسىنىڭ توڭىرەگىندەگى باستى ماسەلەلەردىڭ ءبىرى بولىپ وتىر.
يراندى 37 جىل بيلەگەن ءالي حامەنەي 2026 جىلعى 28 اقپاندا اقش پەن يزرايل كۇشتەرىنىڭ تەگەرانداعى رەزيدەنتسياعا سوققىسىنان قازا تاپقان ەدى.
