مەملەكەت باسشىسى قاسىم-جومارت توقاەۆ قازاقستاندىقتاردى استانا كۇنىمەن قۇتتىقتادى، دەپ حابارلايدى «ادىرنا» ءتىلشىسى.
پرەزيدەنتتىڭ ايتۋىنشا، ەل تاعدىرىنا قاتىستى ماڭىزدى شەشىمدەر قابىلداناتىن باس قالا بۇگىندە اۋقىمدى تاريحي وزگەرىستەردىڭ قوزعاۋشى كۇشىنە اينالعان.
«استانا – ەگەمەن ەلىمىزدىڭ جۇرەگى. ەلوردامىز – تاۋەلسىز قازاقستاننىڭ سيمۆولى، جارقىن بولاشاققا ۇمتىلعان ۇلتىمىزدىڭ جاسامپاز كۇش-قۋاتىنىڭ قاينارى. حالقىمىزدىڭ تاعدىرىنا تىكەلەي اسەر ەتەتىن شەشىمدەر وسى قالادا قابىلدانادى.
باس قالامىز اۋقىمدى تاريحي وزگەرىستەردىڭ قوزعاۋشى كۇشىنە اينالدى. استانا ساپالىق تۇرعىدان مۇلدە جاڭا باسقارۋ جۇيەلەرى ەنگىزىلگەن «اقىلدى قالا» مارتەبەسىنە يە بولدى.
سونىمەن بىرگە ەلوردامىزدا ساياباقتار، گۇلزارلار، بالالارعا ارنالعان الاڭدار سالىندى. وسىنىڭ ءبارى استانا تۇرعىندارى مەن قوناقتارى ءۇشىن جاسالىپ جاتىر.
ەلوردا كۇنى قارساڭىندا ۇلت جىلناماسىنداعى تۇبەگەيلى بەتبۇرىس كەزەڭىنە جول اشقان حالىق كونستيتۋتسياسى زاڭدى كۇشىنە ەندى. مۇنىڭ سيمۆولدىق ءمانى بار. شىن مانىندە، وسى تاريحي وقيعا بيلىك پەن قوعامنىڭ نەگىزگى ينستيتۋتتارىن جاڭعىرتۋ ءىسىنىڭ باستاۋى سانالادى»،–دەدى ول.
پرەزيدەنت جاڭا كونستيتۋتسيالىق زاڭ ەلوردانىڭ ساياسي، اكىمشىلىك، ەكونوميكالىق جانە مادەني ورتالىق رەتىندەگى ءرولىن كۇشەيتكەنىن ايتتى. سونداي-اق استانانىڭ حالىقارالىق بەدەلى ارتىپ كەلە جاتقانىن، وڭىرلىك جانە جاھاندىق دەڭگەيدەگى ماڭىزدى ماسەلەلەردىڭ وسى قالادا تالقىلانۋى سونىڭ دالەلى ەكەنىن جەتكىزدى.
مەملەكەت باسشىسى ەلوردا جاۋاپتى ازاماتتىق ۇستانىمعا، «زاڭ مەن ءتارتىپ» پەن «تازا قازاقستان» قاعيداتتارىنا نەگىزدەلگەن جاڭا قوعامدىق ەتيكانىڭ ۇلگىسى بولۋى ءتيىس ەكەنىن اتاپ ءوتتى.
