پرەزيدەنت قاسىم-جومارت توقاەۆ ءبىر توپ قوعام قايراتكەرىن مەملەكەتتىك ناگرادالارمەن ماراپاتتادى. بۇل تۋرالى بۇگىن، 12 تامىزدا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مەملەكەت باسشىسى اقوردا تورىندە ءومىر جولى وسكەلەڭ ۇرپاققا ۇلگى-ونەگە بولاتىن، ۇلت مۇددەسى ءۇشىن قاجىرلى قىزمەت ەتىپ، حالىقتىڭ ىقىلاسىنا بولەنىپ كەلە جاتقان ءبىر توپ ازاماتقا قۇرمەت كورسەتتى.
اتاپ ايتقاندا، كورنەكتى سۋرەتشى، تانىمال ونەر قايراتكەرى ءباتيما زاۋىربەكوۆاعا «وتان» وردەنى، كورنەكتى ادەبيەتتانۋشى عالىم تۇرسىن جۇرتبايعا I دارەجەلى «بارىس» وردەنى، مەملەكەت قايراتكەرى الەكساندر سۋدينگە II دارەجەلى «بارىس» وردەنى تابىستالدى. بەلگىلى اكتەر، كورنەكتى تەاتر رەجيسسەرى نۇرقانات جاقىپبايعا «قازاقستاننىڭ حالىق ءارتىسى» اتاعى، اۋىل شارۋاشىلىعى سالاسىنىڭ ارداگەرى ۆيكتور حيلنيچەنكوعا «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى بەرىلدى.
قاسىم-جومارت توقاەۆ ماراپات يەلەرىن قۇتتىقتاپ، ارقايسىسىنىڭ ەل ءۇشىن سىڭىرگەن ەڭبەگىنە جەكە-جەكە توقتالدى.
پرەزيدەنت ۇلتتىق مادەنيەتىمىزدى دامىتۋ جولىندا كوپ ەڭبەك ەتىپ، بەينەلەۋ ونەرىندە قايتالانباس قولتاڭباسىمەن ەرەكشەلەنگەن ءباتيما زاۋىربەكوۆا وتاندىق گوبەلەن ونەرى مەكتەبىنىڭ نەگىزىن قالاپ، قازاق ايەلدەرى اراسىنان شىققان وسى سالاداعى تۇڭعىش كاسىبي مامان اتانعانىنا نازار اۋداردى.
– شىعارماشىلىعىڭىز جوعارى دەڭگەيدە مويىندالىپ، مەملەكەتتىك سىيلىقتىڭ يەگەرى بولدىڭىز. حالقىمىزدىڭ تاريحىن، ءبىتىم-بولمىسىن، ويۋ-ورنەگى مەن سالت-ءداستۇرىن دارىپتەۋگە باسا ءمان بەردىڭىز. ءسىزدىڭ تۋىندىلارىڭىز الماتى جانە باسقا دا قالالاردىڭ ايگىلى عيماراتتارىنا كورىك بەرىپ تۇر. تۋىندىلارىڭىز ءوز ەلىمىزبەن قاتار شەت مەملەكەتتەردە ساقتالۋدا. ءسىزدىڭ ەڭبەكتەرىڭىزدى الەمگە بەلگىلى ماماندار وتە جوعارى باعالايدى. ۇلتتىق ونەر جولىندا سالعان دارا جولىڭىز جاس بۋىن ازاماتتارى ءۇشىن تاماشا ۇلگى-ونەگە دەپ سانايمىن، – دەدى مەملەكەت باسشىسى.
قاسىم-جومارت توقاەۆ سانالى عۇمىرىن ۇلت رۋحانياتىن دامىتۋعا ارناپ كەلە جاتقان كورنەكتى عالىم، قارىمدى قالامگەر تۇرسىن جۇرتباي ءتول تاريحىمىزدىڭ اقتاڭداق تۇستارىن زەرتتەپ، حالىقتىڭ سانا-سەزىمىن جاڭعىرتۋعا ەلەۋلى ۇلەس قوسقانىن اتاپ ءوتتى.
– اباي قۇنانبايۇلىنىڭ ءومىرى مەن شىعارماشىلىعىن تەرەڭ زەرتتەپ، جان-جاقتى دارىپتەۋگە زور ەڭبەك ءسىڭىردىڭىز. اباي – ۇلتتىڭ رۋحاني تەمىرقازىعى، وسكەلەڭ ۇرپاقتىڭ اينىماس باعدارى. شىن مانىندە، ۇلى ويشىلدى تانۋ – قازاقتى تانۋ دەگەن ءسوز. ءسىز مۇحتار اۋەزوۆتىڭ جانە ۇلت قايراتكەرلەرىنىڭ مول مۇراسى مەن ونەگەلى ءومىرى تۋرالى قۇندى عىلىمي ەڭبەكتەر جازدىڭىز. شوقتىعى بيىك كوركەم شىعارمالارىڭىز ارقىلى ءتول ادەبيەتىمىزدىڭ قۇندىلىعىن ارتتىرا ءتۇستىڭىز، – دەدى مەملەكەت باسشىسى.
پرەزيدەنت مەملەكەتىمىزدىڭ دامۋىنا تاۋەلسىزدىكتىڭ ەلەڭ-الاڭىنان باستاپ بەلسەنە اتسالىسىپ كەلە جاتقان الەكساندر سۋدينگە العىس ايتتى.
– مەملەكەتتىك قىزمەتتە جۇمىس ىستەگەن جىلدارى زور قۇرمەتكە يە بولدىڭىز. پارلامەنت سەناتىنىڭ دەپۋتاتى رەتىندە حالىق مۇددەسىن قورعادىڭىز. ۆيتسە-سپيكەر جانە سەنات اپپاراتىنىڭ باسشىسى رەتىندە قازاقستاندىق پارلامەنتاريزمنىڭ دامۋىنا قوسقان ۇلەسىڭىزدى ايرىقشا اتاپ وتكىم كەلەدى. ءسىزدىڭ كاسىبي ەڭبەگىڭىز جوعارى باعالانىپ، وتانعا ادال قىزمەت ەتۋدىڭ ۇلگىسىنە اينالدى، – دەدى مەملەكەت باسشىسى.
سونداي-اق پرەزيدەنت تەاتر جانە كينو سالاسىندا جارتى عاسىردان استام ۋاقىت جۇمىس ىستەپ كەلە جاتقان بەلگىلى رەجيسسەر نۇرقانات جاقىپبايدىڭ ءتول مادەنيەتىمىزدى وركەندەتۋ جولىنداعى ەڭبەگى زور ەكەنىن جەتكىزدى.
– كورەرمەننىڭ كوزايىمى بولعان مازمۇندى قويىلىمداردى ساحنالاپ، تەاتر الەمىنىڭ ناعىز مايتالمانى رەتىندە تانىلدىڭىز. كوپتەگەن پەسالار مەن فيلمدەردە ءتۇرلى رولدەردى شەبەر سومداپ، حالىقتىڭ ىستىق ىقىلاسىنا بولەندىڭىز. بۇگىندە جاس تالانتتاردى ونەرگە باۋلىپ، ولارعا باعىت-باعدار بەرىپ كەلەسىز. رۋحانيات سالاسىن دامىتۋعا سىڭىرگەن ەڭبەگىڭىز ءۇشىن وزىڭىزگە شىنايى ريزاشىلىعىمدى بىلدىرەمىن، – دەدى قاسىم-جومارت توقاەۆ.
بۇدان بولەك، مەملەكەت باسشىسى كاسىبي جولىن اگرونومدىقتان باستاپ «حيلنيچەنكو جانە ك» سەرىكتەستىگىنىڭ باسشىسىنا دەيىن كوتەرىلگەن ۆيكتور حيلنيچەنكونىڭ اگروونەركاسىپ سالاسىن دامىتۋعا قوسقان ۇلەسىنە توقتالىپ، الماتى وبلىستىق ءماسليحاتىنىڭ دەپۋتاتى رەتىندە جەمىستى قوعامدىق قىزمەت اتقارعانىن دا اتاپ ءوتتى.
– ەڭ باستىسى، قول جەتكىزگەن جەتىستىكتەرىڭىزگە توقمەيىلسىمەي، الدىڭىزعا جاڭا ءارى بيىك ماقساتتار قويىپ كەلەسىز. ايماقتىڭ اگروونەركاسىپ الەۋەتىن كوتەرۋگە قوسقان زور ۇلەسىڭىز قانداي باعاعا بولسا دا لايىق، – دەدى پرەزيدەنت.
مەملەكەت باسشىسى ءسوزىن تۇيىندەي كەلە، قازىر قازاقستان جان-جاقتى جاڭعىرۋ جولىنا ءتۇسىپ، ەلىمىزدە تۇبەگەيلى وزگەرىستەر جاسالىپ جاتقانىنا نازار اۋداردى.
– ۇلت تاعدىرىن ايقىندايتىن تاريحي شەشىمدەر قابىلداندى. ءبىز ءبىرتۇتاس قوعام بولىپ جالپىۇلتتىق رەفەرەندۋم وتكىزدىك، جاڭا كونستيتۋتسيامىزدى قابىلدادىق. ازاماتتارىمىز جاڭا اتا زاڭدى ءبىراۋىزدان قولداپ، داۋىس بەردى. قازاقتا «بەرەكە باستاۋى – بىرلىك» دەگەن جاقسى ءسوز بار. ءبىز ىرىستى ىنتىماعىمىزدى ساقتاي بىلسەك، ەلىمىز دە ءوسىپ-وركەندەي بەرەدى. كوپ ۇزاماي قازاقستان تاريحىندا العاش رەت قۇرىلتاي سايلاۋى وتەدى. بۇل ەل ومىرىندەگى ماڭىزدى وقيعا بولماق. قازىر ناۋقان بەلسەندى ءوتىپ جاتىر. پارتيالار ساياسي مادەنيەتتىڭ وزىق ۇلگىسىن كورسەتۋدە. الدىمىزدا وتە جاۋاپتى كەزەڭ تۇر. ۇلت بولىپ ۇيىسىپ، ءبىر ەل بولىپ جۇمىلا ەڭبەك ەتەمىز دەپ سەنەمىن، – دەدى قاسىم-جومارت توقاەۆ.
