Prezident Qasym-Jomart Toqaev bır top qoǧam qairatkerın memlekettık nagradalarmen marapattady. Būl turaly bügın, 12 tamyzda Aqordanyŋ baspasöz qyzmetı jazdy, dep habarlaidy «Adyrna» tılşısı.
Memleket basşysy Aqorda törınde ömır joly öskeleŋ ūrpaqqa ülgı-önege bolatyn, ūlt müddesı üşın qajyrly qyzmet etıp, halyqtyŋ yqylasyna bölenıp kele jatqan bır top azamatqa qūrmet körsettı.
Atap aitqanda, körnektı suretşı, tanymal öner qairatkerı Bätima Zäuırbekovaǧa «Otan» ordenı, körnektı ädebiettanuşy ǧalym Tūrsyn Jūrtbaiǧa I därejelı «Barys» ordenı, memleket qairatkerı Aleksandr Sudinge II därejelı «Barys» ordenı tabystaldy. Belgılı akter, körnektı teatr rejisserı Nūrqanat Jaqypbaiǧa «Qazaqstannyŋ halyq ärtısı» ataǧy, auyl şaruaşylyǧy salasynyŋ ardagerı Viktor Hilnichenkoǧa «Qazaqstannyŋ eŋbek sıŋırgen qairatkerı» qūrmettı ataǧy berıldı.
Qasym-Jomart Toqaev marapat ielerın qūttyqtap, ärqaisysynyŋ el üşın sıŋırgen eŋbegıne jeke-jeke toqtaldy.
Prezident ūlttyq mädenietımızdı damytu jolynda köp eŋbek etıp, beineleu önerınde qaitalanbas qoltaŋbasymen erekşelengen Bätima Zäuırbekova otandyq gobelen önerı mektebınıŋ negızın qalap, qazaq äielderı arasynan şyqqan osy saladaǧy tūŋǧyş käsıbi maman atanǧanyna nazar audardy.
– Şyǧarmaşylyǧyŋyz joǧary deŋgeide moiyndalyp, Memlekettık syilyqtyŋ iegerı boldyŋyz. Halqymyzdyŋ tarihyn, bıtım-bolmysyn, oiu-örnegı men salt-dästürın därıpteuge basa män berdıŋız. Sızdıŋ tuyndylaryŋyz Almaty jäne basqa da qalalardyŋ äigılı ǧimarattaryna körık berıp tūr. Tuyndylaryŋyz öz elımızben qatar şet memleketterde saqtaluda. Sızdıŋ eŋbekterıŋızdı älemge belgılı mamandar öte joǧary baǧalaidy. Ūlttyq öner jolynda salǧan dara jolyŋyz jas buyn azamattary üşın tamaşa ülgı-önege dep sanaimyn, – dedı Memleket basşysy.
Qasym-Jomart Toqaev sanaly ǧūmyryn ūlt ruhaniiatyn damytuǧa arnap kele jatqan körnektı ǧalym, qarymdy qalamger Tūrsyn Jūrtbai töl tarihymyzdyŋ aqtaŋdaq tūstaryn zerttep, halyqtyŋ sana-sezımın jaŋǧyrtuǧa eleulı üles qosqanyn atap öttı.
– Abai Qūnanbaiūlynyŋ ömırı men şyǧarmaşylyǧyn tereŋ zerttep, jan-jaqty därıpteuge zor eŋbek sıŋırdıŋız. Abai – ūlttyŋ ruhani temırqazyǧy, öskeleŋ ūrpaqtyŋ ainymas baǧdary. Şyn mänınde, ūly oişyldy tanu – qazaqty tanu degen söz. Sız Mūhtar Äuezovtıŋ jäne ūlt qairatkerlerınıŋ mol mūrasy men önegelı ömırı turaly qūndy ǧylymi eŋbekter jazdyŋyz. Şoqtyǧy biık körkem şyǧarmalaryŋyz arqyly töl ädebietımızdıŋ qūndylyǧyn arttyra tüstıŋız, – dedı Memleket basşysy.
Prezident memleketımızdıŋ damuyna Täuelsızdıktıŋ eleŋ-alaŋynan bastap belsene atsalysyp kele jatqan Aleksandr Sudinge alǧys aitty.
– Memlekettık qyzmette jūmys ıstegen jyldary zor qūrmetke ie boldyŋyz. Parlament Senatynyŋ deputaty retınde halyq müddesın qorǧadyŋyz. Vise-spiker jäne Senat apparatynyŋ basşysy retınde qazaqstandyq parlamentarizmnıŋ damuyna qosqan ülesıŋızdı airyqşa atap ötkım keledı. Sızdıŋ käsıbi eŋbegıŋız joǧary baǧalanyp, Otanǧa adal qyzmet etudıŋ ülgısıne ainaldy, – dedı Memleket basşysy.
Sondai-aq Prezident teatr jäne kino salasynda jarty ǧasyrdan astam uaqyt jūmys ıstep kele jatqan belgılı rejisser Nūrqanat Jaqypbaidyŋ töl mädenietımızdı örkendetu jolyndaǧy eŋbegı zor ekenın jetkızdı.
– Körermennıŋ közaiymy bolǧan mazmūndy qoiylymdardy sahnalap, teatr älemınıŋ naǧyz maitalmany retınde tanyldyŋyz. Köptegen pesalar men filmderde türlı rölderdı şeber somdap, halyqtyŋ ystyq yqylasyna bölendıŋız. Bügınde jas talanttardy önerge baulyp, olarǧa baǧyt-baǧdar berıp kelesız. Ruhaniiat salasyn damytuǧa sıŋırgen eŋbegıŋız üşın özıŋızge şynaiy rizaşylyǧymdy bıldıremın, – dedı Qasym-Jomart Toqaev.
Būdan bölek, Memleket basşysy käsıbi jolyn agronomdyqtan bastap «Hilnichenko jäne K» serıktestıgınıŋ basşysyna deiın köterılgen Viktor Hilnichenkonyŋ agroönerkäsıp salasyn damytuǧa qosqan ülesıne toqtalyp, Almaty oblystyq mäslihatynyŋ deputaty retınde jemıstı qoǧamdyq qyzmet atqarǧanyn da atap öttı.
– Eŋ bastysy, qol jetkızgen jetıstıkterıŋızge toqmeiılsımei, aldyŋyzǧa jaŋa ärı biık maqsattar qoiyp kelesız. Aimaqtyŋ agroönerkäsıp äleuetın köteruge qosqan zor ülesıŋız qandai baǧaǧa bolsa da laiyq, – dedı Prezident.
Memleket basşysy sözın tüiındei kele, qazır Qazaqstan jan-jaqty jaŋǧyru jolyna tüsıp, elımızde tübegeilı özgerıster jasalyp jatqanyna nazar audardy.
– Ūlt taǧdyryn aiqyndaityn tarihi şeşımder qabyldandy. Bız bırtūtas qoǧam bolyp jalpyūlttyq referendum ötkızdık, jaŋa Konstitusiiamyzdy qabyldadyq. Azamattarymyz jaŋa Ata zaŋdy bırauyzdan qoldap, dauys berdı. Qazaqta «Bereke bastauy – bırlık» degen jaqsy söz bar. Bız yrysty yntymaǧymyzdy saqtai bılsek, elımız de ösıp-örkendei beredı. Köp ūzamai Qazaqstan tarihynda alǧaş ret Qūryltai sailauy ötedı. Būl el ömırındegı maŋyzdy oqiǧa bolmaq. Qazır nauqan belsendı ötıp jatyr. Partiialar saiasi mädeniettıŋ ozyq ülgısın körsetude. Aldymyzda öte jauapty kezeŋ tūr. Ūlt bolyp ūiysyp, bır el bolyp jūmyla eŋbek etemız dep senemın, – dedı Qasym-Jomart Toqaev.
