جەتىسۋ وبلىسى قۇرىلعاننان بەرى ءتۋريزمدى، سونىڭ ىشىندە الاكول كولىنىڭ جاعالاۋىن دامىتۋ باعىتىندا جۇيەلى جۇمىستار اتقارىلىپ كەلەدى. پرەزيدەنتتىڭ تاپسىرماسىنا سايكەس جاعالاۋداعى سانيتارلىق تازالىقتى قامتاماسىز ەتۋگە ەرەكشە كوڭىل بولىنگەن، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
اتاپ ايتقاندا، اقشي، كوكتۇما اۋىلدارىنداعى كول جاعالاۋلارىنىڭ تازالىق جۇمىستارىمەن تۇراقتى اينالىساتىن ارنايى «الاكول تازالىق» كوممۋنالدىق كاسىپورنى قۇرىلعان، وندا 50-گە جۋىق قىزمەتكەر جۇمىس ىستەيدى. تازالىق جۇمىستارىنا 20-دان استام تەحنيكا جۇمىلدىرىلعان.
بۇل رەتتە كوممۋنالدىق جاعاجايعا 720 قوقىس كونتەينەرى قويىلعان. سول سياقتى 44 كيىم اۋىستىراتىن كابينا، 24 مودۋلدىك دارەتحانا، 45 بيودارەتحانا ورناتىلعان.
قايىقتار مەن پارومدارعا قاتىستى ايتساق، وتكەن جىلى الاكولدەگى شاعىن ءجۇزۋ قۇرالدارىنىڭ قوزعالىسىن رەتتەۋ ماقساتىندا جەتىسۋ وبلىسىندا ورتاق سۋ پايدالانۋ جانە سۋ ايدىندارىنداعى قاۋىپسىزدىك قاعيدالارى بەكىتىلدى. اتالعان قاعيدالاردا سۋ ايدىندارىنداعى قاۋىپسىزدىك تالاپتارى جان-جاقتى ءتۇسىندىرىلدى، ولاردى ساقتاماعانى ءۇشىن جاۋاپكەرشىلىك بەلگىلەندى.
جالپى، الاكول كولىندە دەمالۋشىلاردىڭ قاۋىپسىزدىگىن قامتاماسىز ەتۋ ماقساتىندا جاعالاۋ اۋماعىندا تاۋلىك بويى كەزەكشىلىك ۇيىمداستىرىلعان. بۇل جۇمىستارعا 14 قۇتقارۋشى، 11 موتورلى قايىق جۇمىلدىرىلعان. سونىمەن قاتار بيىلعى شومىلۋ ماۋسىمىندا قوعامدىق ءتارتىپتى قامتاماسىز ەتۋ ءۇشىن 50 پوليتسيا قىزمەتكەرى، 16 قىزمەتتىك اۆتوكولىك جانە 5 ۇشقىشسىز درون تارتىلعان.
سونىمەن قاتار جاعالاۋ بويىندا 40 قۇتقارۋ مۇناراسى ورناتىلىپ، 13 شاقىرىمعا بۋي سىزىقتارى تارتىلعان. قاۋىپسىزدىكتى قامتاماسىز ەتۋ ماقساتىندا 39 بەينەباقىلاۋ كامەراسى جۇمىس ىستەيدى جانە 7 پيرس پايدالانۋعا بەرىلگەن.
كۇندەلىكتى سۋدا دا، جاعاجايدا دا قاۋىپسىزدىك ماقساتىندا ماماندار تاراپىنان تۇراقتى تۇردە رەيد جۇرگىزىلەدى.
سونداي-اق جاعالاۋ اۋماعىنىڭ جاي-كۇيىن باقىلاۋ، ونىڭ ىشىندە ەكولوگيالىق مادەنيەتتىڭ قاراپايىم تالاپتارىنىڭ ساقتالۋىن قاداعالاۋ بەينەباقىلاۋ جۇيەسى ارقىلى جۇزەگە اسىرىلادى. ورناتىلعان بەينەكامەرالار جەرگىلىكتى پوليتسيانىڭ جەدەل باسقارۋ ورتالىعىنىڭ جۇيەسىنە قوسىلعان. سونىڭ ناتيجەسىندە قوقىس تاستايتىن، كولىك قۇرالدارىن رۇقسات ەتىلمەگەن ورىندارعا قوياتىن جانە وزگە دە قۇقىق بۇزۋشىلىقتارعا جول بەرەتىن ازاماتتار بەينەجازبالار ارقىلى انىقتالىپ، زاڭناماعا سايكەس جاۋاپكەرشىلىككە تارتىلادى.
دەمالۋشىلار كول جاعالاۋىندا جاسالعان جاعدايلارعا وڭ باعاسىن بەردى.
- ەمدىك قاسيەتى بار، تابيعاتى تاماشا الاكول كولىن جاقسى كورەمىز. وتباسىمىزبەن جىل سايىن مىندەتتى تۇردە ءبىر ماۋسىمدا ەكى رەت كەلەمىز. بيىل تازالىققا ەرەكشە كوڭىل بولىنگەنى بىردەن بايقالىپ تۇر. كيىم اۋىستىراتىن ورىندار، جاڭا دارەتحانالار ورناتىلىپ، كامەرالار قويىلعان، جاعاجاي تازا. جىلدان جىلعا دەمالۋشىلارعا جاسالعان جاعدايلار جاقسارعانى ءبىزدى قۋانتادى، - دەدى دەمالۋشىلاردىڭ ءبىرى.
- بيىل جاعالاۋداعى وزگەرىستەر بىردەن كوزگە تۇسەدى. جاعاجاي تاپ-تازا، تازالىق جۇمىستارى تۇراقتى جۇرگىزىلىپ جاتىر. كۇننەن قورعايتىن قولشاتىرلار، دارەتحانالار، كيىم اۋىستىراتىن جانە دەمالۋعا ارنالعان كابينالار ورناتىلعان. ەڭ باستىسى – تازالىقتىڭ ساقتالعانىن ەرەكشە ايتار ەدىم. ءاربىر سانيتارلىق توراپتا بارلىق قاجەتتى گيگيەنالىق قۇرالدار بار، قول جۋعا ارنالعان سۇيىق سابىنعا دەيىن قويىلعان. جالپى، دەمالۋعا جايلى ءارى قولايلى جاعداي جاسالعانىن كورىپ وتىرمىز، – دەدى دەمالىسقا كەلگەن وتباسى مۇشەلەرى.
ەسكە سالساق، الاكول جاعالاۋىندا سوڭعى ءۇش جىلدا ينجەنەرلىك جانە كولىك ينفراقۇرىلىمىن دامىتۋ باعىتىندا ىرگەلى جوبالار ىسكە اسىرىلعان بولاتىن. اتاپ ايتقاندا، كولگە اپاراتىن اۆتوجولدار جاڭارىپ، ءۇشارال اۋەجايىنىڭ ۇشۋ-قونۋ جولاعى جاڭعىرتىلدى. جازعى ماۋسىمدا كولگە كولىكپەن جەتۋدى قامتاماسىز ەتۋدە تەمىر جول باعىتى، اۋە رەيستەرى تۇراقتى ۇيىمداستىرىلعان. وعان قوسا جاعالاۋدى جەتكىلىكتى ەلەكتر قۋاتىمەن قامتۋ ماقساتىندا 57 شاقىرىم ەلەكتر جەلىسى مەن ەكى قوسالقى ستانسا قۇرىلىسى اياقتالدى. بۇل ەلەكتر قۋاتى تاپشىلىعىن جويىپ، قاجەتتى ەلەكتر ەنەرگياسىنىڭ قورىن قالىپتاستىرۋعا مۇمكىندىك بەردى. قازىرگى كەزدە الاكول جاعالاۋىندا جوبالىق قۋاتى جاعىنان ەلىمىزدەگى ءىرى جوبالاردىڭ ءبىرى - تاۋلىگىنە 6,5 مىڭ تەكشە مەتر سۋ تازارتا الاتىن كارىز تازارتۋ قوندىرعىسىنىڭ 2-ءشى كەزەگىنىڭ قۇرىلىسى جۇرۋدە. سونىمەن قاتار، جاعالاۋدى بەكىتۋ جوباسى دا جالعاسۋدا. جاعالاۋ جيەگىنىڭ شايىلۋىن بولدىرماۋعا باعىتتالعان جوبا 14 شاقىرىمعا جۋىق جاعالاۋ اۋماعىن قامتيدى. وتكەن جىلدىڭ شىلدە ايىندا باستالعان قۇرىلىس جۇمىستارىن كەلەسى جىلدىڭ جازىندا اياقتاۋ جوسپارلانىپ وتىر.
