اقىن، اۋدارماشى، مادەنيەت قايراتكەرى، قازاقستان جازۋشىلار وداعىنىڭ مۇشەسى نۇرتاس يساباەۆ 72 جاسقا قاراعان شاعىندا دۇنيەدەن وزدى. قارالى حاباردى، بۇگىن، 9 شىلدەدە جازۋشىلار وداعى تاراتتى، دەپ حابارلايدى «ادىرنا» ءتىلشىسى.
نۇرتاس يبراگيمۇلى 1954 جىلدىڭ 13 قاراشادا قىزىلوردا وبلىسى جاڭاقورعان اۋدانىندا دۇنيەگە كەلگەن. قازاقستان جازۋشىلار وداعى سىيلىعىنىڭ جانە وراز جاندوسوۆ قورى سىيلىعىنىڭ لاۋرەاتى. قازاقستان رەسپۋبليكاسى مادەنيەت جانە اقپارات مينيسترلىگىنىڭ «مادەنيەت قايراتكەرى» توسبەلگىسىمەن ماراپاتتالعان. قازاقستان رەسپۋبليكاسى پرەزيدەنتىنىڭ مەملەكەتتىك ستيپەندياسىنىڭ يەگەرى، «قۇرمەت» وردەنىنىڭ يەگەرى.
ورتا مەكتەپتى بىتىرگەننەن كەيىن ەڭبەك جولىن اۋداندىق گازەتتە كوررەكتور بولىپ باستاعان. 1982 جىلى ماسكەۋ قالاسىنداعى م.گوركي اتىنداعى ادەبيەت ينستيتۋتىن تامامداعان.
نۇرتاس يساباەۆتىڭ العاشقى جىر جيناعى «باستاۋ» 1980 جىلى جارىق كوردى. كەيىن ء«ومىردى ءسۇيۋ» (1987), «ۇلىلىقپەن سىرلاسۋ» (1990), «قيمايمىن سەنى» (1998), «ومىرگە قۇشتارلىق» جانە باسقا دا پوەزيالىق كىتاپتارى وقىرمانعا جول تارتتى. اقىننىڭ بىرقاتار ولەڭدەرى «رازبەگ» اتتى ورىس تىلىندەگى ۇجىمدىق جيناققا ەنگەن. سونىمەن قاتار ورىس اقىنى الەكساندر تۆاردوۆسكيدىڭ شىعارمالارىن قازاق تىلىنە اۋدارىپ، ۇلتتىق اۋدارما سالاسىنىڭ دامۋىنا ۇلكەن ۇلەس قوسقان.
اقىننىڭ الەۋمەتتىك جەلىدەگى سوڭعى جازباسى كوپشىلىكتىڭ نازارىن اۋداردى. وندا ول مىناداي ولەڭ جولدارىن جاريالاعان:
«جۇرەگىمدە شوقتاي، لاۋلاپ مازداعان،
سەزىمىمنەن جانىپ كەتە جازداعام.
بىراق جەتۋ مۇمكىن ەمەس ەكەن عوي،
باقىتىڭا پەشەنەڭە جازباعان…»
جەلى قولدانۋشىلارى بۇل جولداردى اقىننىڭ سوڭعى شىعارماشىلىق ۇندەۋى رەتىندە قابىلداپ، مارقۇمنىڭ تۋعان-تۋىستارى مەن جاقىندارىنا كوڭىل ايتۋدا.
