Aqyn, audarmaşy, Mädeniet qairatkerı, Qazaqstan Jazuşylar odaǧynyŋ müşesı Nūrtas İsabaev 72 jasqa qaraǧan şaǧynda dünieden ozdy. Qaraly habardy, bügın, 9 şıldede Jazuşylar odaǧy taratty, dep habarlaidy «Adyrna» tılşısı.
Nūrtas İbragimūly 1954 jyldyŋ 13 qaraşada Qyzylorda oblysy Jaŋaqorǧan audanynda düniege kelgen. Qazaqstan Jazuşylar odaǧy syilyǧynyŋ jäne Oraz Jandosov qory syilyǧynyŋ laureaty. Qazaqstan Respublikasy Mädeniet jäne aqparat ministrlıgınıŋ «Mädeniet qairatkerı» tösbelgısımen marapattalǧan. Qazaqstan Respublikasy Prezidentınıŋ Memlekettık stipendiiasynyŋ iegerı, «Qūrmet» ordenınıŋ iegerı.
Orta mekteptı bıtırgennen keiın eŋbek jolyn audandyq gazette korrektor bolyp bastaǧan. 1982 jyly Mäskeu qalasyndaǧy M.Gorkii atyndaǧy Ädebiet institutyn tämamdaǧan.
Nūrtas İsabaevtyŋ alǧaşqy jyr jinaǧy «Bastau» 1980 jyly jaryq kördı. Keiın «Ömırdı süiu» (1987), «Ūlylyqpen syrlasu» (1990), «Qimaimyn senı» (1998), «Ömırge qūştarlyq» jäne basqa da poeziialyq kıtaptary oqyrmanǧa jol tartty. Aqynnyŋ bırqatar öleŋderı «Razbeg» atty orys tılındegı ūjymdyq jinaqqa engen. Sonymen qatar orys aqyny Aleksandr Tvardovskiidıŋ şyǧarmalaryn qazaq tılıne audaryp, ūlttyq audarma salasynyŋ damuyna ülken üles qosqan.
Aqynnyŋ äleumettık jelıdegı soŋǧy jazbasy köpşılıktıŋ nazaryn audardy. Onda ol mynadai öleŋ joldaryn jariialaǧan:
«Jüregımde şoqtai, laulap mazdaǧan,
Sezımımnen janyp kete jazdaǧam.
Bıraq jetu mümkın emes eken ǧoi,
Baqytyŋa peşeneŋe jazbaǧan…»
Jelı qoldanuşylary būl joldardy aqynnyŋ soŋǧy şyǧarmaşylyq ündeuı retınde qabyldap, marqūmnyŋ tuǧan-tuystary men jaqyndaryna köŋıl aituda.
