9 شىلدە كۇنى اقمولا وبلىسىنداعى «بالداۋرەن» رەسپۋبليكالىق وقۋ-ساۋىقتىرۋ ورتالىعىندا شەتەلدەگى ەتنيكالىق قازاق بالالارىنا ارنالعان «اتامەكەن: قازاق دنق-سىن اشۋ» حالىقارالىق بالالار قۇرىلتايى ءوتتى، دەپ حابارلايدى "ادىرنا" ءتىلشىسى.
بيىلعى جوباعا الەمنىڭ 8 ەلىنەن 288 قازاق بالاسى قاتىسىپ، تاريحي وتانىمەن قاۋىشتى.
قۇرىلتاي قازاقستان رەسپۋبليكاسى وقۋ-اعارتۋ مينيسترلىگىنىڭ جانە تيمۋر قۇلىباەۆتىڭ Halyk قايىرىمدىلىق قورىنىڭ قولداۋىمەن، دۇنيەجۇزى قازاقتارى قاۋىمداستىعىنىڭ ۇيىمداستىرۋىمەن ءوتتى.
قۇرىلتاي بارىسىندا Halyk قايىرىمدىلىق قورىنىڭ باسقارۋشى ديرەكتورى "بالداۋرەن" وقۋ-ساۋىقتىرۋ ورتالىعىنىڭ كىتاپحاناسىنا قازاقتىڭ دارا اقىنى اباي قۇنانبايۇلىنىڭ قازاق، ورىس، اعىلشىن تىلىندەگى كىتاپتارىن سىيعا تارتتى.
«تيمۋر قۇلىباەۆتىڭ Halyk قايىرىمدىلىق قورى دۇنيەجۇزى قازاقتارىنىڭ قاۋىمداستىعىمەن بىرنەشە جىلدان بەرى تۇراقتى سەرىكتەستىك ورناتىپ كەلەدى. بيىلعى قۇرىلتاي – وسى جۇيەلى قولداۋدىڭ ناقتى كورىنىسى. شەتەلدە تۇراتىن ءاربىر قازاق بالاسى – ۇلتتىڭ اماناتى. سوندىقتان ءبىز ولاردىڭ تاريحي وتانىمەن بايلانىسىن نىعايتىپ، انا ءتىلى مەن ۇلتتىق مادەنيەتىن ساقتاۋعا ۇلەس قوسۋدى ماڭىزدى سانايمىز. باستى ماقساتىمىز – بالالاردىڭ بۇل ساپاردان جارقىن اسەر الىپ قانا قويماي، وزدەرىنىڭ قازاقى بولمىسىن تەرەڭىرەك سەزىنىپ قايتۋىنا مۇمكىندىك جاساۋ»، – دەدى Halyk قايىرىمدىلىق قورىنىڭ باسقارۋشى ديرەكتورى ناريمان ابىلشايىقوۆ
7-21 شىلدە ارالىعىندا شەتەلدەگى قازاق بالالارى اتاجۇرتى بولعان قازاقستاننىڭ تاريحىمەن، مادەنيەتىمەن، ۇلتتىق قۇندىلىقتارىمەن تانىسىپ قانا قويماي، ءتۇرلى شىعارماشىلىق جانە تانىمدىق باعدارلامالارعا قاتىستى. ولار جاڭا دوستارىمەن قازاقى ورتادا ەركىن تىلدەسۋگە مۇمكىندىك الدى.
بيىلعى قۇرىلتايدىڭ «اتامەكەن: قازاق دنق-سىن اشۋ» دەپ اتالۋىنىڭ وزىندىك ءمانى بار.
ء"وتىنىش بىلدىرگەن قانداستاردىڭ اراسىنان ءارتۇرلى سالادا جەتىستىككە جەتكەن، جۇلدەلى ورىن العان دارىندى بالالار ىرىكتەلەدى. ءبىر سوزبەن ايتقاندا، جۇزدەن جۇيرىك، مىڭنان تۇلپار اتانعان، سايدىڭ تاسىنداي ىرىكتەلگەن بالالار. ءىس-شارانىڭ باستى ماقساتى – شەتەلدەگى قازاق بالالارىن اتاجۇرتىمەن بايلانىستىرۋ، قازاق حالقىنىڭ بولمىسىن، سالت-ءداستۇرىن، ءتىلى مەن مادەنيەتىن تەرەڭىرەك تانىتۋ، – دەدى جوبانى ۇيىمداستىرۋشىلاردىڭ ءبىرى قارلىعاش بەكپاتشاقىزى.
جوبا اياسىندا ۇيىمداستىرۋشىلار قازاقتىڭ ۇلتتىق بولمىسىن تەك تەگىمەن ەمەس، انا تىلىمەن، دومبىرا ۇنىمەن، ۇلتتىق انمەن، ايتىس ونەرىمەن، سالت-داستۇرىمەن، ۇلكەنگە قۇرمەت، كىشىگە ىزەت كورسەتۋىمەن جانە تۋعان جەرگە دەگەن سۇيىسپەنشىلىكپەن بايلانىستىردى.
"دۇنيەجۇزى قازاقتارى قاۋىمداستىعىنىڭ نەگىزگى ميسسياسى – بالالاردى تاريحي وتانىمەن بايلانىستىرىپ، ۇلتتىق تامىرىن تەرەڭدەتۋ. نەبارى بەس بالادان باستالعان بۇل جوبا بۇگىندە 288 بالانى قامتىپ وتىر. بۇگىنگى بالا – ەرتەڭگى ەلدىڭ ازاماتى. ەلگە كەلگەن سوڭ بالالار ءبىر-بىرىمەن تانىسىپ، ارالاسادى. بۇل – كەلەشەك ءۇشىن ماڭىزدى رۋحاني كوپىر" – دەدى دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ .
بيىلعى قۇرىلتايدىڭ ەرەكشە ساتتەرىنىڭ ءبىرى – قىتايدان كەلگەن جاس اقىنداردىڭ بالالارعا ايتىس ونەرىن تانىستىرۋى بولدى. سونىمەن قاتار قىتاي، موڭعوليا جانە وزبەكستاننان كەلگەن بالالار ۇلتتىق ونەرلەرىن كورسەتىپ، ءان ايتىپ، بي بيلەپ، ءوز ەلدەرىندەگى قازاق مادەنيەتىن تانىستىردى.
سونىمەن قاتار، شەتەلدەن كەلگەن بالالار اراسىندا 9-شى اۋىسىمنىڭ ارنايى پرەزيدەنتى سايلانىپ، بالالار ارنايى باعدارلاما بويىنشا كوڭىل كوتەرىپ، مادەنيەتپەن تانىسادى.
وزبەكستان ەلىنەن كەلگەن وقۋ وزاتى ديداربەك نۇرلانۇلى بۇل اۋىسىمعا تۇسكەنىنە قۋانىشتى ەكەنىن ايتتى.
"بالداۋرەن" لاگەرى وتە كوڭىلدى، اۋا رايى دا زور. مەن قازاقستاندا بىرنەشە رەت بولدىم، بىراق، بۋرابايعا العاش رەت كەلدىم. قازاقستانعا كوشۋ جوسپارىمىزدا بار", - دەيدى ول.
ال موڭعوليادان كەلگەن راببينا داۋىربەكقىزى قازاقستاندا جوعارى ءبىلىم الىپ، قازاقستاندا ەڭبەك ەتكىسى كەلەتىنىن ايتتى.
"بالداۋرەندە" بالالار وتە كوپ. تۋىستارىمىزدى دا تاۋىپ جاتىرمىز. تاماقتارى ءدامدى، ورتا كوڭىلدى، قازاقتاردى كورىپ، قۋانىپ جاتىرمىن، كوپ راقمەت", - دەدى ول. 
