9 şılde künı Aqmola oblysyndaǧy «Baldäuren» respublikalyq oqu-sauyqtyru ortalyǧynda şeteldegı etnikalyq qazaq balalaryna arnalǧan «Atameken: qazaq DNQ-syn aşu» halyqaralyq balalar qūryltaiy öttı, dep habarlaidy "Adyrna" tılşısı.
Biylǧy jobaǧa älemnıŋ 8 elınen 288 qazaq balasy qatysyp, tarihi Otanymen qauyşty.
Qūryltai Qazaqstan Respublikasy oqu-aǧartu ministrlıgınıŋ jäne Timur Qūlybaevtyŋ Halyk qaiyrymdylyq qorynyŋ qoldauymen, Düniejüzı qazaqtary qauymdastyǧynyŋ ūiymdastyruymen öttı.
Qūryltai barysynda Halyk qaiyrymdylyq qorynyŋ basqaruşy direktory "Baldäuren" oqu-sauyqtyru ortalyǧynyŋ kıtaphanasyna qazaqtyŋ dara aqyny Abai Qūnanbaiūlynyŋ qazaq, orys, aǧylşyn tılındegı kıtaptaryn syiǧa tartty.
«Timur Qūlybaevtyŋ Halyk qaiyrymdylyq qory Düniejüzı qazaqtarynyŋ qauymdastyǧymen bırneşe jyldan berı tūraqty serıktestık ornatyp keledı. Biylǧy qūryltai – osy jüielı qoldaudyŋ naqty körınısı. Şetelde tūratyn ärbır qazaq balasy – ūlttyŋ amanaty. Sondyqtan bız olardyŋ tarihi Otanymen bailanysyn nyǧaityp, ana tılı men ūlttyq mädenietın saqtauǧa üles qosudy maŋyzdy sanaimyz. Basty maqsatymyz – balalardyŋ būl sapardan jarqyn äser alyp qana qoimai, özderınıŋ qazaqy bolmysyn tereŋırek sezınıp qaituyna mümkındık jasau», – dedı Halyk qaiyrymdylyq qorynyŋ basqaruşy direktory Nariman Äbılşaiyqov
7-21 şılde aralyǧynda şeteldegı qazaq balalary atajūrty bolǧan Qazaqstannyŋ tarihymen, mädenietımen, ūlttyq qūndylyqtarymen tanysyp qana qoimai, türlı şyǧarmaşylyq jäne tanymdyq baǧdarlamalarǧa qatysty. Olar jaŋa dostarymen qazaqy ortada erkın tıldesuge mümkındık aldy.
Biylǧy qūryltaidyŋ «Atameken: qazaq DNQ-syn aşu» dep ataluynyŋ özındık mänı bar.
"Ötınış bıldırgen qandastardyŋ arasynan ärtürlı salada jetıstıkke jetken, jüldelı oryn alǧan daryndy balalar ırıkteledı. Bır sözben aitqanda, jüzden jüirık, myŋnan tūlpar atanǧan, saidyŋ tasyndai ırıktelgen balalar. Is-şaranyŋ basty maqsaty – şeteldegı qazaq balalaryn Atajūrtymen bailanystyru, qazaq halqynyŋ bolmysyn, salt-dästürın, tılı men mädenietın tereŋırek tanytu, – dedı jobany ūiymdastyruşylardyŋ bırı Qarlyǧaş Bekpatşaqyzy.
Joba aiasynda ūiymdastyruşylar qazaqtyŋ ūlttyq bolmysyn tek tegımen emes, ana tılımen, dombyra ünımen, ūlttyq änmen, aitys önerımen, salt-dästürımen, ülkenge qūrmet, kışıge ızet körsetuımen jäne tuǧan jerge degen süiıspenşılıkpen bailanystyrdy.
"Düniejüzı qazaqtary qauymdastyǧynyŋ negızgı missiiasy – balalardy tarihi Otanymen bailanystyryp, ūlttyq tamyryn tereŋdetu. Nebärı bes baladan bastalǧan būl joba bügınde 288 balany qamtyp otyr. Bügıngı bala – erteŋgı eldıŋ azamaty. Elge kelgen soŋ balalar bır-bırımen tanysyp, aralasady. Būl – keleşek üşın maŋyzdy ruhani köpır" – dedı Düniejüzı qazaqtary qauymdastyǧy töraǧasynyŋ bırınşı orynbasary Zauytbek Tūrysbekov .
Biylǧy qūryltaidyŋ erekşe sätterınıŋ bırı – Qytaidan kelgen jas aqyndardyŋ balalarǧa aitys önerın tanystyruy boldy. Sonymen qatar Qytai, Moŋǧoliia jäne Özbekstannan kelgen balalar ūlttyq önerlerın körsetıp, än aityp, bi bilep, öz elderındegı qazaq mädenietın tanystyrdy.
Sonymen qatar, şetelden kelgen balalar arasynda 9-şy auysymnyŋ arnaiy prezidentı sailanyp, balalar arnaiy baǧdarlama boiynşa köŋıl köterıp, mädenietpen tanysady.
Özbekstan elınen kelgen oqu ozaty Didarbek Nūrlanūly būl auysymǧa tüskenıne quanyşty ekenın aitty.
"Baldäuren" lagerı öte köŋıldı, aua raiy da zor. Men Qazaqstanda bırneşe ret boldym, bıraq, Burabaiǧa alǧaş ret keldım. Qazaqstanǧa köşu josparymyzda bar", - deidı ol.
Al Moŋǧoliiadan kelgen Rabbina Däuırbekqyzy Qazaqstanda joǧary bılım alyp, Qazaqstanda eŋbek etkısı keletının aitty.
"Baldäurende" balalar öte köp. Tuystarymyzdy da tauyp jatyrmyz. Tamaqtary dämdı, orta köŋıldı, qazaqtardy körıp, quanyp jatyrmyn, köp raqmet", - dedı ol. 
