وقۋ-اعارتۋ ءمينيسترى جۇلدىز سۇلەيمەنوۆانىڭ اتىنا قاتىستى تاراعان «ۇجىمدىق حات» قوعامدا قىزۋ تالقىلانىپ جاتىر. وسى ماسەلەگە بايلانىستى جاڭا پارلامەنتكە كانديدات مۇرات ابەنوۆ قۇجاتتىڭ شىنايىلىعى مەن تارالۋ جولىنا كۇمان كەلتىرىپ، مينيسترگە قارسى ۇيىمداستىرىلعان اقپاراتتىق ناۋقان بولۋى مۇمكىن دەگەن پىكىر ءبىلدىردى، دەپ حابارلايدى “ادىرنا”.
ونىڭ ايتۋىنشا، پرەزيدەنت اكىمشىلىگىنەن الىنعان مالىمەتكە سايكەس، اقورداعا جولداندى دەلىنگەن حات رەسمي تۇردە تىركەلمەگەن. سوعان قاراماستان، قۇجات قىسقا ۋاقىت ىشىندە الەۋمەتتىك جەلىلەر مەن بىرقاتار اقپارات قۇرالدارىندا كەڭىنەن تارالعان.
«پرەزيدەنت اكىمشىلىگىنە مۇنداي حات تۇسپەگەنى تۋرالى اقپارات الدىم. سوندا پرەزيدەنتكە جەتپەگەن حات الەۋمەتتىك جەلىگە قالاي تاراپ كەتتى؟» دەگەن ساۋال قويدى ابەنوۆ.
ونىڭ سوزىنشە، ءمينيستردىڭ جۇمىسىنا سىن ايتۋ مەن قوعامدا وعان قاتىستى ادەيى تەرىس كوزقاراس قالىپتاستىرۋ – ەكى بولەك ماسەلە. سونىمەن قاتار، حاتقا قول قويدى دەلىنگەن كەيبىر ازاماتتاردىڭ وزدەرى بۇل قۇجاتتىڭ اۆتورى ەمەس ەكەنىن مالىمدەگەنى ايتىلدى. وسى جايت دەپۋتاتتىڭ پىكىرىنشە، نەگىزگى ماقساتتىڭ پرەزيدەنتكە ۇندەۋ جولداۋ ەمەس، ءمينيستردىڭ بەدەلىنە نۇقسان كەلتىرۋ بولۋى مۇمكىن ەكەنىن كورسەتەدى.
الەۋمەتتىك جەلىدە تاراعان حاتتا جۇلدىز سۇلەيمەنوۆانىڭ بىرقاتار قىزمەتكەرلەردى جۇمىستان شەتتەتكەنى نەگىزگى سىن رەتىندە كورسەتىلگەن. الايدا مۇرات ابەنوۆ مۇنداي كادرلىق وزگەرىستەردى قالىپتى باسقارۋشىلىق ۇدەرىس دەپ باعالايدى.
ابەنوۆتىڭ مالىمەتىنشە، ءبىلىم بەرۋ جۇيەسىندە شامامەن ءبىر ميلليونعا جۋىق ادام ەڭبەك ەتەدى. ونىڭ ىشىندە 600 مىڭنان استامى مەكتەپتەردە جۇمىس ىستەيدى. بالاباقشالار، كوللەدجدەر، قوسىمشا ءبىلىم بەرۋ ۇيىمدارى مەن باسقا دا مەكەمەلەردى ەسەپكە العاندا، جارتى جىلدىڭ ىشىندە بىرنەشە ونداعان قىزمەتكەردىڭ اۋىسۋى قالىپتى جاعداي سانالادى.
سونداي-اق ول تىزىمدە كورسەتىلگەن بىرنەشە ازاماتپەن جەكە سويلەسكەنىن ايتىپ، ولاردىڭ كوپشىلىگى قىزمەتتەن ءوز ەركىمەن كەتكەنىن جانە ەشقانداي قىسىم كورمەگەنىن جەتكىزگەنىن مالىمدەدى.
مۇرات ابەنوۆتىڭ پىكىرىنشە، مينيسترلىككە قاتىستى كادرلىق وزگەرىستەردىڭ وبەكتيۆتى سەبەپتەرى بار. سوڭعى جىلدارى ءبىلىم سالاسىندا ءتۇرلى زاڭبۇزۋشىلىقتار مەن ماسەلەلەردىڭ كوبەيگەنىن اتاپ وتكەن ول، پرەزيدەنت قاسىم-جومارت توقاەۆ جۇلدىز سۇلەيمەنوۆانى وسى باعىتتاعى جۇيەلى رەفورمالاردى جۇزەگە اسىرۋ ءۇشىن تاعايىنداعانىن ايتتى.
بۇرىنعى دەپۋتاتتىڭ ايتۋىنشا، مينيسترلىك جەكەمەنشىك مەكتەپتەردىڭ قىزمەتىن باقىلاۋدى كۇشەيتىپ، زاڭسىز ليتسەنزيالاردىڭ جولىن كەسۋ باعىتىندا ناقتى شارالار قابىلداپ كەلەدى. ونىڭ پايىمىنشا، مۇنداي ارەكەتتەر بەلگىلى ءبىر مۇددەلى توپتاردىڭ قارسىلىعىن تۋدىرۋى مۇمكىن.
«جۇلدىز سۇلەيمەنوۆا ەڭبەك جولىن مۇعالىمدىكتەن باستاپ، مەكتەپ ديرەكتورىنا دەيىن وسكەن، ءبىلىم بەرۋ سالاسىن جاقسى بىلەتىن مامان. قازىرگى قولعا الىنىپ جاتقان وزگەرىستەر بۇرىننان قالىپتاسقان كەيبىر جۇيەلەرگە اسەر ەتىپ جاتقاندىقتان، ءتۇرلى قارسىلىقتاردىڭ بولۋى زاڭدى»، – دەدى مۇرات ابەنوۆ.
