حالىق كەڭەسىنىڭ مۇشەلەرىنە جالاقى تولەنبەيدى. بۇل تۋرالى بۇگىن، 24 قىركۇيەك كۇنى كەڭەس مۇشەسى مۇرات ابەنوۆ ايتتى، دەپ حابارلايدى «ادىرنا» ءتىلشىسى.
ول قازاقستان حالىق كەڭەسىنىڭ جوعارى كونستيتۋتسيالىق كونسۋلتاتيۆتىك ورگان ەكەنىن ەسكە سالدى.
«حالىق كەڭەسىنىڭ مۇشەلەرى بۇل جۇمىستى اقىسىز اتقارادى، ياعني جالاقى المايدى. بۇل – تولىقتاي قوعامدىق نەگىزدەگى قىزمەت. ىشكى قۇندىلىقتارىمىزعا، ۇستانىمدارىمىزعا، كوزقاراستارىمىزعا جانە ادالدىعىمىزعا سۇيەنە وتىرىپ، شىنايى ءارى ساپالى جۇمىس ىستەۋگە تىرىسامىز»، – دەدى ول.
ايتۋىنشا، كەڭەس مۇشەلەرى قانداي دا ءبىر لاۋازىم يەلەنبەيدى جانە مەملەكەتتىك قىزمەتكەر بولىپ سانالمايدى.
«بىزگە ارنايى كابينەت تە، قىزمەتتىك كولىك تە بەكىتىلمەيدى. ارقايسىمىز ءوز قىزمەتىمىزدى قاتار الىپ جۇرەمىز»، – دەپ اتاپ ءوتتى ابەنوۆ.
ەسكە سالايىق، 1 شىلدەدەن باستاپ قازاقستاننىڭ جاڭا كونستيتۋتسياسى كۇشىنە ەنگەن ەدى. اتا زاڭعا ەنگىزىلگەن وزگەرىستەردى ازاماتتار 15 ناۋرىزدا وتكەن رەسپۋبليكالىق رەفەرەندۋمدا قولداعان بولاتىن.
قازاقستان حالىق كەڭەسىنىڭ نەگىزگى ماقساتى – مەملەكەتتىك ساياساتتى قالىپتاستىرۋ مەن ىسكە اسىرۋ ۇدەرىسىنە كونسۋلتاتيۆتىك تۇردە قاتىسۋ ارقىلى قازاقستان حالقىنىڭ مۇددەسىنىڭ مەملەكەتتىك باسقارۋ جۇيەسىندە ەسكەرىلۋىن قامتاماسىز ەتۋ.
