اقش پرەزيدەنتى دونالد ترامپ يران بيلىگى وزىنە قاستاندىق ۇيىمداستىرعان جاعدايدا ەلگە اۋقىمدى اسكەري سوققى جاساۋ تۋرالى الدىن الا بۇيرىق بەرگەنىن مالىمدەدى. ونىڭ ايتۋىنشا، اقش اسكەري كۇشتەرى ءتيىستى نۇسقاۋلىقتى الىپ قويعان.
«1000 زىمىران ۇشىرۋعا دايىن جانە ول يران يسلام رەسپۋبليكاسىنا باعىتتالعان. ەگەر يران ۇكىمەتى اقش-تىڭ قازىرگى پرەزيدەنتىن، ياعني مەنى ءولتىرۋ نەمەسە ولتىرۋگە ارەكەت جاساۋ تۋرالى قوقان-لوققىسىن جۇزەگە اسىرسا، ولاردىڭ ارتىنان بىردەن مىڭداعان وزگە زىمىران ۇشىرىلادى»، – دەپ جازدى ترامپ ءوزىنىڭ Truth Social الەۋمەتتىك جەلىسىندەگى پاراقشاسىندا.
ول سونداي-اق بۇيرىق الدەقاشان بەرىلگەنىن جانە مۇنداي جاعداي ورىن السا، اقش قارۋلى كۇشتەرى ءبىر جىل ىشىندە يراننىڭ بارلىق ءوڭىرىن تولىقتاي جويۋعا دايىن ەكەنىن ايتتى.
ال New York Post گازەتىنە بەرگەن سۇحباتىندا ترامپ قازا تاپقان جاعدايدا ورىندالاتىن ارنايى نۇسقاۋلىق قالدىرعانىن جەتكىزدى.
«ەگەر ماعان بىردەڭە بولسا، ولاردى بۇرىن-سوڭدى بولماعانداي ەتىپ بومبالاڭدار»، – دەدى اقش پرەزيدەنتى.
ترامپتىڭ سوزىنشە، يران 2020 جىلى ونىڭ بۇيرىعىمەن ء«ال-كۋدس» كۇشتەرىنىڭ قولباسشىسى قاسەم سۇلەيماني جويىلعاننان بەرى ءوزىن باستى نىسانا رەتىندە قاراستىرىپ كەلەدى.
«مەن ولاردىڭ تىزىمىندە باياعىدان بەرى ءبىرىنشى ورىندامىن. ءومىر دەگەن وسى... مەنى ساعىناتىن شىعارسىزدار دەپ ۇمىتتەنەمىن»، – دەدى ول.
باسىلىمنىڭ جازۋىنشا، وسى اپتادا يراننىڭ بۇرىنعى جوعارى كوشباسشىسى ءالي حامەنەيدى جەرلەۋ ءراسىمى كەزىندە قاتىسۋشىلار دونالد ترامپقا قوقان-لوققى جاسالعان جانە ونى ولتىرۋگە ۇندەگەن جازۋلارى بار پلاكاتتار ۇستاپ شىققان.
سونىمەن قاتار، CNN تەلەارناسى دەرەككوزدەرىنە سىلتەمە جاساپ، يزرايل بارلاۋ قىزمەتى اقش-قا ناقتى قاستاندىق جوسپارى تۋرالى ەمەس، يران بيلىگى وكىلدەرىنىڭ امەريكالىق پرەزيدەنتتى جويۋ نيەتىن بىلدىرەتىن مالىمدەمەلەرى جونىندە اقپارات بەرگەنىن حابارلادى.
