ۇلىتاۋ وبلىسىندا پروكۋرورلار مەملەكەتكە قۇنى 443 ملن تەڭگە بولاتىن 31 جەر ۋچاسكەسىن قايتاردى، دەپ حابارلايدى «ادىرنا» ءتىلشىسى.
باس پروكۋراتۋرانىڭ مالىمەتىنشە، جۇرگىزىلگەن قاداعالاۋ جۇمىستارى كەزىندە جەر ۋچاسكەلەرىن بەرۋ جانە پايدالانۋ بارىسىندا زاڭ تالاپتارىنىڭ بۇزىلۋ فاكتىلەرى انىقتالعان.
اتاپ ايتقاندا، جاڭاارقا اۋدانىندا قۇنى 334 ملن تەڭگە بولاتىن، اۋدانى 169 گا اۋىل شارۋاشىلىعى ماقساتىنداعى جەر ۋچاسكەسىن زاڭسىز بەرۋ فاكتىسى بەلگىلى بولعان.
جەزقازعان قالاسىندا ۋاقىتشا جەر پايدالانۋ قۇقىعىنىڭ مەرزىمى اياقتالعاننان كەيىن مەملەكەت مەنشىگىنە قايتارىلماعان، جالپى اۋدانى 2,9 گا بولاتىن قۇنى 96 ملن تەڭگە 29 جەر ۋچاسكەسى انىقتالعان.
بۇدان بولەك، قۇنى 11 ملن تەڭگە بولاتىن كوممەرتسيالىق ماقساتتاعى جەر ۋچاسكەسىن زاڭسىز بەرۋ دەرەگى تىركەلگەن.
«پروكۋرورلىق قاداعالاۋ اكتىلەرىن قاراۋ ناتيجەسىندە جالپى قۇنى 443 ملن تەڭگە بولاتىن 31 جەر ۋچاسكەسى مەملەكەت مەنشىگىنە قايتارىلدى. جەر زاڭناماسىنىڭ ساقتالۋىن قامتاماسىز ەتۋ جانە جەر قاتىناستارى سالاسىنداعى مەملەكەت مۇددەسىن قورعاۋ جۇمىستارى جالعاسۋدا»،– دەلىنگەن حابارلامادا.
