ۇلىتاۋ وبلىسىنىڭ اكىمى ەسەت بايكەن جۇمىس ساپارى بارىسىندا جەزقازعان قالاسىنداعى تەمىر جول ۆوكزالىن جاڭعىرتۋ جۇمىستارىنىڭ بارىسىمەن تانىستى.
بۇگىندە نىساندا ىشكى جانە سىرتقى قابىرعالاردى تەگىستەۋ، شاتىر جابىندىسىن اۋىستىرۋ، ىشكى ارلەۋ، جىلۋ، جەلدەتۋ جانە سۋ بۇرۋ جۇيەلەرىن ورناتۋ جۇمىستارى تولىق اياقتالعان. قازىرگى تاڭدا عيماراتتىڭ قاسبەتىن ارلەۋ جانە ەكىنشى قاباتتاعى ينجەنەرلىك جۇيەلەردى مونتاجداۋ جۇمىستارى جۇرگىزىلۋدە.
جاڭعىرتۋ اياسىندا ۆوكزالعا زاماناۋي ەسكالاتور مەن ليفت ورناتىلعان. ەكىنشى قاباتتا جولاۋشىلارعا ارنالعان فۋدكورت ورنالاسادى. سونىمەن قاتار، مۇمكىندىگى شەكتەۋلى ازاماتتاردىڭ كەدەرگىسىز ءجۇرىپ-تۇرۋىنا بارلىق قاجەتتى جاعداي قاراستىرىلعان.
جالپى اۋماعى 2 500 شارشى مەتردى قۇرايتىن نىساندى ارالاۋ بارىسىندا وبلىس اكىمى قاسبەتتى ارلەۋدە قولدانىلاتىن زاماناۋي ساندىك سىلاقتىڭ ساپاسىنا ەرەكشە نازار اۋدارىپ، قۇرىلىس جۇمىستارىنىڭ جوعارى دەڭگەيدە ورىندالۋىن قامتاماسىز ەتۋدى تاپسىردى. سونداي-اق اۋماقتى اباتتاندىرۋ جۇمىستارىن بەلگىلەنگەن مەرزىمدە ءارى ساپالى اياقتاۋدى قاتاڭ باقىلاۋدا ۇستاۋدى مىندەتتەدى.
ايتا كەتەيىك، مەملەكەت باسشىسىنىڭ تاپسىرماسىنا سايكەس ۇلىتاۋ وبلىسىندا ءتورت تەمىر جول ۆوكزالىن جاڭعىرتۋ جۇمىستارى جۇزەگە اسىرىلۋدا. اتاپ ايتقاندا، جەزقازعان جانە قاراجال قالالارىنداعى ۆوكزالدار، قىزىلجار ستانتسياسى مەن جاڭاارقا كەنتىندەگى تەمىر جول ۆوكزالدارى تولىق جاڭعىرتىلىپ جاتىر. بارلىق ءتورت نىساندى بيىل پايدالانۋعا بەرۋ جوسپارلانعان.
