تۇركىستان وبلىسى، سوزاق اۋدانى، تاۋكەنت قالاشىعىنىڭ اكىمى سەرىك مامانوۆ كامەلەتتىك جاسقا تولماعان بالالاردى جيناپ الىپ، شىمكەنتتىك يمام جارقىن مىرزاتايدىڭ ۋاعىزىن تىڭداتقىزعان. تۇركىستان وبلىسىنىڭ قوعامدىق دامۋ باسقارماسى كەنت اكىمى سەرىك مامانوۆتىڭ وسى ءىس-ارەكەتىن اقتاپ وتىر، - دەپ حابارلايدى "ادىرنا" ۇلتتىق پورتالىنىڭ ءتىلشىسى.
سەرىك مامانوۆتىڭ باستاماسىمەن ءوتتى دەلىنگەن ۋاعىزدى جۇرگىزگەن يمام جارقىن مىرزاتاي جەتكىنشەكتەردى اتا-اناسىنا قارسى قوياتىن "قۇدايدىڭ پارىزىنىڭ الدىندا اكە-شەشەڭ دەمالادى", "اتا-انادان ناماز وقۋ، ورامال تاعۋ ءۇشىن سۇرانباسا دا بولادى" دەگەن ايگىلى سوزدەرىمەن تانىمال.
بۇل ۆيدەو “ادىرنا” ۇلتتىق پورتالىنىڭ الەۋمەتتىك جەلىدەگى پاراقشالارىندا دا جاريالانعان ەدى.
سول بەينەجازباعا قاتىستى تۇركىستان وبلىستىق قوعامدىق باسقارماسىنان تومەندەگى سۇراقتارعا جاۋاپ بەرۋدى سۇراعانبىز.
1. مەملەكەتتىك قىزمەتكەردىڭ، ياعني اكىمنىڭ كامەلەتتىك جاسقا تولماعان جاستاردى جيناپ، ۋاعىز تىڭداتۋى قانشالىقتى زاڭدى؟
2. يدەولوگيالىق تۇرعىدا اكىمنىڭ كامەلەتتىك جاسقا تولماعان بالالاردى جيناپ الۋعا، ولارعا ءدىني ۋاعىز ايتقىزۋعا قۇقى بار ما؟ بۇل ونىڭ اكىمدىك مىندەتىنە كىرە مە؟
3. يمام جاس جەتكىنشەكتەرگە: «اتا-انادان ناماز وقۋ ءۇشىن، ورامال تاعۋ ءۇشىن سۇرانباسا بولادى» دەپ ۋاعىز ايتادى. بۇل جاستاردى اتا-اناعا قارسى قويۋ ەمەس پە؟
4. قازاقستان – زايىرلى مەملەكەت. سول زايىرلى مەملەكەتتىڭ مەملەكەتتىك قىزمەتكەرىنىڭ ءدىن ىسىنە قول سۇعۋىنا تۇركىستان وبلىسىنىڭ قوعامدىق دامۋ باسقارماسى قانداي باعا بەرەدى؟
بۇل سۇراقتارعا وبلىستىق قوعامدىق دامۋ باسقارماسى بىلاي جاۋاپ بەرگەن. قاراڭىز:
"2023 جىلعى 18 تامىز كۇنى جارقىن مىرزاتاي ەسىمدى ۋاعىزشى سوزاق اۋدانىنىڭ تاۋكەنت كەنتىنە كەلىپ، «اق بوساعا» ءدامحاناسىندا جاستارمەن كەزدەسۋ وتكىزگەن. كەزدەسۋدى «جىنىس اتا» مەشىتىنىڭ يمامى ن.مىرزابەكوۆ باستاعان ءدىني جاماعات ۇيىمداستىرعان.
سوزاق اۋدانىنىڭ تاۋكەنت كەنتى اكىمى س.مامانوۆتىڭ ءىس-ارەكەتىندە مەملەكەتتىك قىزمەتشىلەردىڭ قىزمەتتىك ادەپ قاعيدالارىنا سايكەس، سوزاق اۋدانى اكىمى اپپاراتىنىڭ باسشىسى ادەپ جونىندەگى ۋاكىلى تاراپىنان 21.08.2023 جىلى قىزمەتتىك تەكسەرۋ جۇرگىزىلدى جانە قازاقستان رەسپۋبليكاسى مەملەكەتتىك قىزمەتشىلەرىنىڭ ادەپ كودەكسىنىڭ نورمالارىن ساقتاۋ جانە بۇزۋشىلىقتاردىڭ الدىن الۋ بويىنشا وتىرىس وتكىزىلدى.
ماجىلىستە تاۋكەنت كەنتتىنىڭ اكىمى س.مامانوۆتىڭ ماسەلەسى قارالدى. ناتيجەسىندە اتالعان كەزدەسۋدى «تاۋكەنت كەنتى اكىمى اپپاراتى» مەملەكەتتىك مەكەمەسى ۇيىمداستىرماعان جانە س.مامانوۆ كەنتتىڭ جاستارى مەن بالالارىن ءدىني ۋاعىز تىڭداۋعا شاقىرماعان.
ۇيىمداستىرۋشىلاردىڭ شاقىرتۋىمەن بارىپ، اتالعان كەنتتىڭ تۇرعىنى رەتىندە قاتىسقان. سونداي-اق، 2023 جىلدىڭ 01 تامىزىنان باستاپ 06 قىركۇيەك ارالىعىندا كەنت اكىمى س.مامانوۆ كەزەكتى ەڭبەك دەمالىسىندا بولعانى انىقتالدى.
تاۋكەنت كەنتى اكىمى س.مامانوۆ تاراپىنان قر «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭىنىڭ، ادەپ كودەكسىنىڭ تالاپتارى بۇزىلماعاندىعى انىقتالىپ، الداعى ۋاقىتتا زاڭ تالاپتارىن قاتاڭ ساقتاۋ بويىنشا ءتۇسىندىرىلدى" دەلىنگەن.
جاۋاپتان اڭعارعانىمىز تاۋكەنت قالاسىنىڭ اكىمى سەرىك مامانوۆ 1-تامىز بەن 6-قىركۇيەك كۇنى اراسىندا ەڭبەك دەمالىسىندا بولىپتى. بىراق، اۋداننىڭ الەۋمەتتىك جەلىدەگى پاراقشالارىنان ايتىلعان مەرزىم ارالىعىندا اكىمنىڭ ەڭبەك دەمالىسىندا بولماعانىن، كۇندەلىكتى جۇمىسىندا جۇرگەنىن بايقادىق.
مىسالى، 10 تامىز كۇنى تاۋكەنت كەنتىنىڭ اكىمى تۇرعىندارمەن كەزدەسىپ، جۇرت الدىندا ەسەپ بەرگەن. قاراڭىز:
تۇركىستان وبلىسىنىڭ قوعامدىق دامۋ باسقارماسى ءبىر وتىرىكتى جابۋ ءۇشىن ەكىنشى وتىرىكتى ايتىپ وتىرعان جوق پا؟ ەندىگى قويىلار ساۋال وسى...
قانات بىرلىكۇلى
ادىرنا ۇلتتىق پورتالى
