اقش-تىڭ يراننىڭ وڭتۇستىك ايماقتارىنا جاساعان اۋە سوققىلارى سالدارىنان كەمىندە 30 بەيبىت تۇرعىن قازا تاپتى. بۇل تۋرالى يران ۇكىمەتىنىڭ رەسمي وكىلى فاتەمە موحادجەراني ايتتى، دەپ حابارلايدى «ادىرنا» ءتىلشىسى ريا نوۆوستيگە سىلتەمە جاساپ.
«سوڭعى بىرنەشە كۇندە يراننىڭ وڭتۇستىك بولىگىنە جاسالعان شابۋىلدار ناتيجەسىندە 30-دان استام بەيبىت تۇرعىن كوز جۇمدى»، – دەپ جازدى ول X الەۋمەتتىك جەلىسىندەگى پاراقشاسىندا.
كەيىنىرەك سوققىلار سالدارىنان جەتى اسكەري قىزمەتكەردىڭ قازا تاپقانى حابارلاندى.
«اقش اسكەرىنىڭ شابۋىلى كەزىندە يرانشاحرداعى 388-بريگادانىڭ جەتى قىزمەتكەرى مەن مەرزىمدى اسكەري قىزمەتشىسى قازا تاپتى»، – دەلىنگەن مالىمدەمەدە.
اقپاراتتى يراننىڭ مەملەكەتتىك تەلەراديو كومپانياسى تاراتتى. سونداي-اق يران اسكەري كۇشتەرى اقش-تىڭ سارسەنبى كۇنى تاڭەرتەڭ يراننىڭ وڭتۇستىك-شىعىسىنداعى بەمپۋر اۋدانىندا ورنالاسقان اسكەري نىساندارعا 13 زىمىران ۇشىرعانىن مالىمدەدى.
11 شىلدەدە يران دەنساۋلىق ساقتاۋ مينيسترلىگى كەمىندە 17 ادامنىڭ قازا تاپقانىن حابارلاعان بولاتىن. ال 15 شىلدەدە زارداپ شەككەندەر سانى 260 ادامعا جەتكەنى ءمالىم بولدى.
«ەلىمىزگە قارسى اسكەري شيەلەنىستىڭ جاڭا تولقىنى باستالعالى بەرى 260-تان استام ادام جاراقات الدى. ولاردىڭ ۇشەۋى – ايەل، التاۋى – 18 جاسقا تولماعاندار»، – دەپ جازدى يران دەنساۋلىق ساقتاۋ مينيسترلىگىنىڭ ءباسپاسوز حاتشىسى حوسەين كەرمانپۋر X الەۋمەتتىك جەلىسىندە.
ول قازا تاپقاندار سانى بويىنشا جاڭارتىلعان مالىمەت ۇسىنعان جوق.
8 شىلدەدەن باستاپ اقش اسكەرى يرانعا قارسى بىرنەشە رەت اۋە شابۋىلدارىن جاساعان ەدى. اقش قارۋلى كۇشتەرىنىڭ ورتالىق قولباسشىلىعى بۇل ارەكەتتەردى ورمۇز بۇعازى ارقىلى وتكەن كوممەرتسيالىق كەمەلەرگە قاتىستى يراننىڭ ءىس-قيمىلدارىنا جاۋاپ رەتىندە جۇرگىزىلگەنىن مالىمدەگەن. ءوز كەزەگىندە يران اسكەرى تاياۋ شىعىستاعى بىرقاتار ەلدە ورنالاسقان اقش اسكەري بازالارىنا سوققى بەرگەن بولاتىن.
