AQŞ-tyŋ İrannyŋ oŋtüstık aimaqtaryna jasaǧan äue soqqylary saldarynan kemınde 30 beibıt tūrǧyn qaza tapty. Būl turaly İran ükımetınıŋ resmi ökılı Fateme Mohadjerani aitty, dep habarlaidy «Adyrna» tılşısı RİA Novostige sılteme jasap.
«Soŋǧy bırneşe künde İrannyŋ oŋtüstık bölıgıne jasalǧan şabuyldar nätijesınde 30-dan astam beibıt tūrǧyn köz jūmdy», – dep jazdy ol X äleumettık jelısındegı paraqşasynda.
Keiınırek soqqylar saldarynan jetı äskeri qyzmetkerdıŋ qaza tapqany habarlandy.
«AQŞ äskerınıŋ şabuyly kezınde İranşahrdaǧy 388-brigadanyŋ jetı qyzmetkerı men merzımdı äskeri qyzmetşısı qaza tapty», – delıngen mälımdemede.
Aqparatty İrannyŋ memlekettık teleradio kompaniiasy taratty. Sondai-aq İran äskeri küşterı AQŞ-tyŋ särsenbı künı taŋerteŋ İrannyŋ oŋtüstık-şyǧysyndaǧy Bempur audanynda ornalasqan äskeri nysandarǧa 13 zymyran ūşyrǧanyn mälımdedı.
11 şıldede İran Densaulyq saqtau ministrlıgı kemınde 17 adamnyŋ qaza tapqanyn habarlaǧan bolatyn. Al 15 şıldede zardap şekkender sany 260 adamǧa jetkenı mälım boldy.
«Elımızge qarsy äskeri şielenıstıŋ jaŋa tolqyny bastalǧaly berı 260-tan astam adam jaraqat aldy. Olardyŋ üşeuı – äiel, altauy – 18 jasqa tolmaǧandar», – dep jazdy İran Densaulyq saqtau ministrlıgınıŋ baspasöz hatşysy Hosein Kermanpur X äleumettık jelısınde.
Ol qaza tapqandar sany boiynşa jaŋartylǧan mälımet ūsynǧan joq.
8 şıldeden bastap AQŞ äskerı İranǧa qarsy bırneşe ret äue şabuyldaryn jasaǧan edı. AQŞ Qaruly küşterınıŋ Ortalyq qolbasşylyǧy būl äreketterdı Ormūz būǧazy arqyly ötken kommersiialyq kemelerge qatysty İrannyŋ ıs-qimyldaryna jauap retınde jürgızılgenın mälımdegen. Öz kezegınde İran äskerı Taiau Şyǧystaǧy bırqatar elde ornalasqan AQŞ äskeri bazalaryna soqqy bergen bolatyn.
