ماڭعىستاۋدا جولدى تيىسىنشە كۇتىپ ۇستاماۋ ءىسى بويىنشا قازاقستانداعى العاشقى ۇكىم شىقتى. بۇل تۋرالى بۇگىن، 15 شىلدەدە باس كولىك پروكۋراتۋراسى ايتتى، دەپ حابارلايدى «ادىرنا» ءتىلشىسى.
قايعىلى وقيعا 2026 جىلدىڭ 16 قاڭتارىندا رەسپۋبليكالىق ماڭىزى بار «دوسسور – قۇلسارى – بەينەۋ – ساي-وتەس – شەتپە – جەتىباي – اقتاۋ» اۆتوجولىندا بولعان ەدى. كوكتايعاقتىڭ كەسىرىنەن Yutong جولاۋشىلار اۆتوبۋسى جولدان شىعىپ كەتىپ، اۋدارىلعان بولاتىن. اپات سالدارىنان بەس ادام قازا تاۋىپ، تاعى 14 ادام ءتۇرلى جاراقاتتار الدى.
«تەرگەپ-تەكسەرۋ امالدارىن باس كولىك پروكۋراتۋراسىنىڭ ارنايى پروكۋرورلارى جۇرگىزدى. ولار قايعىلى وقيعاعا اۆتوجولدى قىسقى كەزەڭدە تيىسىنشە كۇتىپ ۇستاماۋ سەبەپ بولعانىن انىقتادى. تەرگەۋ جاۋاپتى تۇلعالاردىڭ ارەكەتسىزدىگى مەن ورىن العان اۋىر سالدار اراسىنداعى تىكەلەي سەبەپ-سالدارىن دالەلدەدى»،–دەلىنگەن حابارلامادا.
سوت ۇكىمىمەن «كاجسەرۆيس» جشس ماڭعىستاۋ وبلىستىق فيليالىنىڭ №57 جول پايدالانۋ بولىمشەسىنىڭ (جپب-57) باستىعى قر قك-ءنىڭ 353-بابى 4-بولىگى بويىنشا كىنالى دەپ تانىلدى. وعان 2 جىل 6 اي مەرزىمگە شارتتى تۇردە باس بوستاندىعىنان ايىرۋ جازاسى تاعايىندالدى.
ايتا كەتەيىك، بۇل — قازاقستاننىڭ قۇقىق قولدانۋ تاجىريبەسىندەگى، اۆتوموبيل جولىن قىستا تيىسىنشە كۇتىپ ۇستاماۋ ادامداردىڭ ءولىمى ءۇشىن قىلمىستىق جاۋاپتىلىققا تارتۋعا نەگىز بولعان تۇڭعىش قىلمىستىق ءىس.
