قازاقستان پرەزيدەنتى اكىمشىلىگىنىڭ جانە قالالىق ءماسليحات دەپۋتاتتارىنىڭ كەلىسىمىمەن تەمىرتاۋ قالاسىنىڭ اكىمى بولىپ ساپار ساتاەۆ تاعايىندالدى. جاڭا باسشىنى تەمىرتاۋ قالاسىنىڭ اكتيۆىنە قاراعاندى وبلىسىنىڭ اكىمى ەرماعانبەت بولەكپاەۆ تانىستىرىپ، قالا باسشىسىنىڭ الدىنا قويىلعان نەگىزگى مىندەتتەردى ايقىنداپ بەردى، دەپ حابارلايدى "ادىرنا".
"ساپار ساتاەۆتىڭ مەملەكەتتىك باسقارۋ جۇيەسىندە تاجىريبەسى مول. ول الەۋمەتتىك-ەكونوميكالىق دامۋ ماسەلەلەرىن جاقسى بىلەدى ءارى قاجەتتى كاسىبي بىلىكتىلىككە يە. سونىمەن قاتار بالقاش قالاسىنداعى قىزمەتى بارىسىندا ءىرى ونەركاسىپ كاسىپورىندارىمەن ءتيىمدى ارىپتەستىك ورناتا ءبىلدى. بۇل تاجىريبە تەمىرتاۋدا دا قالا قۇراۋشى مەتاللۋرگيالىق كاسىپورىنمەن ىنتىماقتاستىقتى ودان ءارى دامىتۋعا سەرپىن بەرەدى دەپ سەنەمىن. ونىڭ باسشىلىعىمەن جىلۋمەن جانە سۋمەن جابدىقتاۋ جۇيەلەرىن جاڭعىرتۋ، جولداردى جوندەۋ باعىتىندا اۋقىمدى جوبالار جۇزەگە اسىرىلدى. سونىڭ ناتيجەسىندە كوممۋنالدىق ينفراقۇرىلىمنىڭ سەنىمدىلىگى ەداۋىر ارتىپ، كورسەتىلەتىن قىزمەتتەردىڭ ساپاسى جاقساردى. ساپار قايىركەنۇلى، ءسىزدىڭ باستى مىندەتىڭىز – تەمىرتاۋلىقتاردىڭ ءومىر ءسۇرۋ ساپاسىن ارتتىرۋ، تۇرعىندار ءۇشىن جايلى ءارى قاۋىپسىز قالالىق ورتا قالىپتاستىرۋ، سونداي-اق قالانىڭ ورنىقتى الەۋمەتتىك-ەكونوميكالىق دامۋىن قامتاماسىز ەتۋ", – دەدى وبلىس اكىمى.
ساپار ساتاەۆ ەڭبەك جولىن 2002 جىلى "قازاقاۆتوجول" رەسپۋبليكالىق مەملەكەتتىك كاسىپورنىندا باستاعان. ءار جىلدارى "بوتاقارا سۋ قوجالىعى" كوممۋنالدىق مەملەكەتتىك قازىنالىق كاسىپورنى ديرەكتورىنىڭ ورىنباسارى جانە ديرەكتوردىڭ مىندەتىن اتقارۋشى قىزمەتتەرىن اتقارعان.
مەملەكەتتىك قىزمەتتە 2010 جىلدان بەرى ەڭبەك ەتىپ كەلەدى. قاراعاندى وبلىسى بۇقار جىراۋ اۋدانىنداعى بوتاقارا كەنتىنىڭ اكىمى بولدى.
