الماتى وبلىسىندا دۇنيەگە كەلگەن ۇشەمنىڭ ۇشەۋى دە شەتىنەپ كەتتى، دەپ حابارلايدى "ادىرنا" ۇلتتىق پورتالى Almaty.tv-عا سىلتەپ.
مارقۇم سابيلەردىڭ تۋىستارى مەديتسينالىق كومەك كورسەتۋ بارىسىندا قاتەلىك جىبەرىلگەن بولۋى مۇمكىن دەپ كۇدىكتەنىپ، قۇقىق قورعاۋ ورگاندارىنا جۇگىنگەن. تۋىستارىنىڭ ايتۋىنشا، ايەلدىڭ جۇكتىلىگى العاشقى التى اي بويى قالىپتى وتكەن. 17 شىلدەدەن 18 شىلدەگە قاراعان ءتۇنى ونىڭ تولعاعى مەرزىمىنەن بۇرىن باستالىپ، الدىمەن جامبىل اۋداندىق اۋرۋحاناسىنا جەتكىزىلگەن. كەيىن قاسكەلەڭدەگى پەرزەنتحاناعا اۋىستىرىلىپ، تاڭعى ساعات 07:00-دە ۇشەم دۇنيەگە كەلگەن.
وتباسىنىڭ مالىمەتىنشە، دارىگەرلەر الدىمەن ەكى نارەستەنىڭ شەتىنەپ كەتكەنىن حابارلاعان. كەيىن ءۇشىنشى ءسابيدىڭ جاعدايىن ءبىلۋ ءۇشىن پەرزەنتحاناعا بارعان كەزدە ونىڭ دا كوز جۇمعانى بەلگىلى بولعان. مارقۇمداردىڭ تۋىستارى سابيلەردىڭ دەنەسىن الۋ كەزىندە قاجەتتى رەسمي قۇجاتتاردىڭ بەرىلمەگەنىن ايتىپ، بالالاردىڭ ءمايىتىن سايكەستەندىرۋگە قاتىستى كۇمان كەلتىرىپ وتىر.
ءوز كەزەگىندە قاراساي كلينيكالىق كوپبەيىندى ورتالىق اۋداندىق اۋرۋحاناسى ايەلدىڭ جۇكتىلىكتىڭ 25-اپتاسىندا شۇعىل جاعدايدا تۇسكەنىن مالىمدەدى. مەديتسينالىق مەكەمە مالىمەتىنشە، مۇنداي مەرزىمدە دۇنيەگە كەلگەن سابيلەردىڭ ءومىر ءسۇرۋ مۇمكىندىگى وتە تومەن بولادى، ويتكەنى ولاردىڭ ومىرلىك ماڭىزدى مۇشەلەرى تولىق جەتىلمەيدى. سونداي-اق اۋرۋحانادا كورسەتىلگەن مەديتسينالىق كومەكتىڭ ساپاسىنا قاتىستى ىشكى اۋديت باستالعانى حابارلاندى.
وقيعاعا بايلانىستى مارقۇمداردىڭ تۋىستارى تاۋەلسىز ءارى جان-جاقتى تەرگەۋ جۇرگىزۋدى، نارەستەلەردىڭ ولىمىنە نە سەبەپ بولعانىن انىقتاپ، كىنالىلەردى جاۋاپكەرشىلىككە تارتۋدى تالاپ ەتتى. ولاردىڭ ايتۋىنشا، ءۇشىنشى ءسابيدىڭ دەنەسى ازىرگە وتباسى مۇشەلەرىنە بەرىلمەگەن.
