الماتى وبلىسىنىڭ بورالداي كەنتىندە موپەد جۇرگىزۋشىسى جاياۋ جۇرگىنشىلەر وتكەلىمەن ءوتىپ بارا جاتقان زەينەتكەردى قاعىپ كەتتى، دەپ حابارلايدى "ادىرنا" ءتىلشىسى.
الەۋمەتتىك جەلىدەگى almaty_typical پاراقشاسىندا جاريالانعان بەينەدە جۇرگىزۋشى جول-كولىك وقيعاسى بولعان جەردەن كەتىپ قالعانى كورىنەدى. وقيعا بەينەباقىلاۋ كامەراسىنا ءتۇسىپ قالعان. الدىن الا مالىمەت بويىنشا، جول اپاتى 20 شىلدە كۇنى ساعات 16:03 شاماسىندا ابىلاي حان كوشەسىندە بولعان. بەينەجازبادا ەكى ادام مىنگەن موپەدتىڭ جاياۋ جۇرگىنشىلەر وتكەلىمەن ءوتىپ بارا جاتقان ايەلدى جوعارى جىلدامدىقپەن قاعىپ كەتكەنى كورىنەدى. سوققى سالدارىنان جاياۋ جۇرگىنشى، موپەد جۇرگىزۋشىسى مەن جولاۋشى قىز جولعا قۇلاعان.
الماتى وبلىسى پوليتسيا دەپارتامەنتىنىڭ مالىمەتىنشە، جول-كولىك وقيعاسىنان كەيىن وقيعا ورنىن تاستاپ كەتكەن موپەد جۇرگىزۋشىسىنىڭ جەكە باسى جەدەل انىقتالعان.
«جاياۋ جۇرگىنشىنى قاعىپ، جول-كولىك وقيعاسى بولعان جەردەن كەتىپ قالعان موپەد جۇرگىزۋشىسى انىقتالىپ، اكىمشىلىك جاۋاپكەرشىلىككە تارتىلدى. وقيعا سالدارىنان جاياۋ جۇرگىنشى مەن موپەد جولاۋشىسى ءتۇرلى دەنە جاراقاتىمەن اۋرۋحاناعا جەتكىزىلدى»، – دەپ حابارلادى پوليتسيا.
