اقتوبەدە بىرنەشە ەر ادام تۇرعىندى كۇشتەپ كولىكتىڭ جۇكسالعىشىنا سالىپ، ۇرلاماق بولعان، دەپ حابارلايدى "ادىرنا" ۇلتتىق پورتالى.
وقيعا ءساتى جول بويىمەن ءوتىپ بارا جاتقان كولىكتىڭ بەينەتىركەگىشىنە ءتۇسىپ قالعان. الدىن الا مالىمەت بويىنشا، جانجال جاياۋ جۇرگىنشىلەر وتكەلىندە باستالعان. جولدان ءوتىپ بارا جاتقان ازامات جۇرگىزۋشىگە ەسكەرتۋ جاساعاننان كەيىن ولاردىڭ اراسىندا سوزگە كەلىسپەۋشىلىك تۋىنداعان.
اقتوبە وبلىستىق پوليتسيا دەپارتامەنتىنىڭ مالىمەتىنشە، وسىدان كەيىن كۇدىكتىلەر جابىرلەنۋشىنىڭ ءۇيىنىڭ ماڭىنا بارىپ، ونى كۇتىپ تۇرعان. ەر ادام تاكسيمەن شىققان ساتتە بەلگىسىز ادامدار كولىكتى توقتاتىپ، ونى كۇشتەپ سىرتقا شىعارىپ، Lexus ماركالى اۆتوكولىكتىڭ جۇكسالعىشىنا سالىپ الىپ كەتكەن. وقيعادان كەيىن پوليتسەيلەر جەدەل-ىزدەستىرۋ شارالارىن جۇرگىزىپ، ارنايى ماقساتتاعى جاساقتىڭ كومەگىمەن كۇدىكتىلەر مىنگەن كولىكتى توقتاتتى. جەلىدە تاراعان بەينەجازبادا ءتارتىپ ساقشىلارىنىڭ Lexus كولىگىن قورشاپ، كۇدىكتىلەردى جەرگە جاتقىزىپ، قولدارىنا كىسەن سالعانى كورىنەدى.
قازىر ادام ۇرلاۋ فاكتىسى بويىنشا سوتالدى تەرگەۋ باستالدى.
