كاسىپكەردىڭ كەسىرىنەن تۇركىستان وبلىسىنىڭ تۇرعىندارى اۋىز سۋسىز قالۋى مۇمكىن، دەپ حابارلايدى “ادىرنا” ۇلتتىق پورتالى.
«ءبىزدىڭ شىدامىمىزدىڭ دا شەگى بار. ءبىر كاسىپكەردىڭ ارەكەتىنەن جەرگىلىكتى تۇرعىنداردىڭ بارلىعى زارداپ شەگۋدە. كۇن وتكەن سايىن جۇمىس قارقىندى جۇرگىزىلىپ، سونىڭ سالدارىنان وڭىردەگى سۋ دەڭگەيى تومەندەپ بارادى»، – دەپ نارازىلىقتارىن ءبىلدىردى ورداباسى اۋدانىنا قاراستى قاراسپان اۋىلدىق وكرۋگىنىڭ تۇرعىندارى “وتىرار” باسىلىمىنا بەرگەن سۇحباتىندا.
ايتۋلارىنشا، كاسىپكەرلەر 15 جىلدان بەرى جۇرگىزگەن كارەر جۇمىستارىنىڭ كەسىرىنەن سۋ دەڭگەيى تومەندەپ جاتىر. قىزىل كىتاپقا ەنگەن وسىمدىكتەرى بار اۋماق شولگە اينالعان.
«بىزدە سۋ سوراتىن قۇدىق بار. قازىر سۋدى سورۋ وتە قيىن. بۇرىن تۇتقانى ءبىر ايداعاندا 2 جارىم ليتر سۋ شىعاتىن. ەندى سول مولشەردە سۋ الۋ ءۇشىن 10-20 رەت سورۋ كەرەك»، – دەيدى تۇرعىن جاسداۋرەن وتەنباەۆ.
بۇل رەتتە پوليتسەيلەر ارىزداردى قابىلداماي، كارەردەگى زاڭ بۇزۋشىلىقتاردى كورمەي وتىر. ورداباسى اۋدانى اكىمىنىڭ ورىنباسارى ازات ورالباەۆتىڭ ايتۋىنشا، اتالعان كەمشىلىكتەر ءۇشىن كومپانياعا قازىردىڭ وزىندە 51 ميلليون تەڭگە ايىپپۇل سالىنىپتى.
باسىلىم كارەرگە يەلىك ەتەتىن كومپانيا جەردى 2049 جىلعا دەيىن جالعا العانىن اتاپ وتەدى. تۇرعىندار ءۇزىلدى-كەسىلدى قارسى. كاسىپكەر جۇمىسىن توقتاتپاسا، ۇكىمەت پەن پرەزيدەنتتەن كومەك سۇراۋدى جوسپارلاپ وتىر.
“ادىرنا” ۇلتتىق پورتالى
