اقش 2026 جىلعى 24 شىلدەدەن باستاپ قازاقستاننان يمپورتتالاتىن جەكەلەگەن تاۋارلارعا 12,5% كولەمىندە قوسىمشا كەدەندىك باج سالىعىن ەنگىزەدى. بۇل تۋرالى قازاقستان رەسپۋبليكاسى ساۋدا جانە ينتەگراتسيا مينيسترلىگىنىڭ ءباسپاسوز قىزمەتى حابارلادى، دەپ جازادى "ادىرنا".
مينيسترلىكتىڭ مالىمەتىنشە، اقش بۇل شەشىمدى 23 شىلدەدە 1974 جىلعى ساۋدا تۋرالى زاڭنىڭ 301-ءبولىمى اياسىندا جۇرگىزىلگەن تەرگەۋ ناتيجەسىندە قابىلداعان.
سونىمەن قاتار ۆەدومستۆونىڭ ەسەپتەۋىنشە، قازاقستاندىق ەكسپورتتىڭ باسىم بولىگى جاڭا شەكتەۋدىڭ ىقپالىنا ۇشىرامايدى.
«مينيسترلىكتىڭ ەسەپتەۋىنشە، اقش-قا ەكسپورتتالاتىن قازاقستاندىق ونىمدەردىڭ شامامەن 95 پايىزى بۇرىنعىداي قوسىمشا باج سالىعىنىڭ قولدانىلۋ اياسىنان تىس قالادى»، – دەلىنگەن حابارلامادا.
ساۋدا جانە ينتەگراتسيا مينيسترلىگى قوسىمشا باج سالىعى اقش ساۋدا وكىلدىگى بەكىتكەن ەرەكشەلىكتەر تىزىمىنە ەنگىزىلگەن تاۋارلارعا قولدانىلمايتىنىن اتاپ ءوتتى.
سونداي-اق بۇعان دەيىن ەنگىزىلگەن 10 پايىزدىق ۋاقىتشا يمپورتتىق ۇستەمە باجدىڭ 150 كۇندىك مەرزىمى اياقتالعاندىقتان كۇشىن جويعانى جانە ونىڭ جاڭا 12,5 پايىزدىق باج سالىعىمەن بىرگە ەسەپتەلمەيتىنى حابارلاندى.
ۆەدومستۆو قازاقستاندىق ەكسپورتتاۋشىلاردىڭ مۇددەسىن قورعاۋ جانە ەكى ەل اراسىنداعى ساۋدا قاتىناستارىن ساقتاپ قالۋ ماقساتىندا اقش تاراپىمەن ءوزارا قولايلى شەشىمدەر ىزدەۋ بويىنشا جۇمىستى جالعاستىرىپ جاتقانىن مالىمدەدى.
