بايزاق اۋدانىندا پروكۋراتۋرا جەتىم بالالار مەن اتا-اناسىنىڭ قامقورلىعىنسىز قالعان ستۋدەنتتەردىڭ بۇزىلعان قۇقىقتارىن قالپىنا كەلتىردى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
بايزاق اۋدانى پروكۋراتۋراسىنىڭ مالىمەتىنشە، جۇرگىزىلگەن تالداۋ بارىسىندا «بايزاق №3 كوللەدجى» كوممۋنالدىق مەملەكەتتىك قازىنالىق كاسىپورنىندا جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ قۇقىقتارىنىڭ بۇزىلعانى انىقتالعان.
تەكسەرۋ ناتيجەسىندە جەتىم جانە اتا-اناسىنىڭ قامقورلىعىنسىز قالعان 7 ستۋدەنتكە، سونداي-اق مۇگەدەكتىگى بار 1 ستۋدەنتكە زاڭمەن كوزدەلگەن الەۋمەتتىك كەپىلدىكتەردىڭ بەرىلمەگەنى بەلگىلى بولدى.
اتاپ ايتقاندا، ستۋدەنتتەرگە كانيكۋل كەزىندە دەمالۋعا جولدامالار ۇسىنىلماعان، جول ءجۇرۋ جانە تاۋلىكتىك شىعىندارى وتەلمەگەن، كيىم-كەشەكپەن قامتاماسىز ەتىلمەگەن. سونىمەن قاتار ەكى ايلىق ەسەپتىك كورسەتكىش كولەمىندەگى بىرجولعى الەۋمەتتىك كومەك تە تولەنبەگەن.
اتالعان زاڭ بۇزۋشىلىقتارعا بايلانىستى كوللەدج باسشىلىعىنىڭ اتىنا پروكۋرورلىق قاداعالاۋ اكتىسى ەنگىزىلدى. ناتيجەسىندە انىقتالعان كەمشىلىكتەر تولىق جويىلىپ، ستۋدەنتتەردىڭ الەۋمەتتىك قۇقىقتارى قالپىنا كەلتىرىلدى.
