الماتى قالاسىنىڭ «قارۋ» جەدەل-پروفيلاكتيكالىق ءىس-شاراسى بارىسىندا پوليتسەيلەر جەرگىلىكتى تۇرعىننان بىرنەشە جىل بۇرىن ۇرلانعان تەگىس ۇڭعىلى اڭشى مىلتىعىنىڭ كەسىلگەن نۇسقاسىن انىقتادى، دەپ حابارلايدى "ادىرنا" ۇلتتىق پورتالى.
تەكسەرۋ ازاماتتىق قارۋدى ساقتاۋ قاعيدالارىنىڭ ساقتالۋىن باقىلاۋ اياسىندا جۇرگىزىلگەن. تىركەلگەن اڭشى مىلتىقتارىمەن قاتار، شىعۋ تەگى بەلگىسىز قارۋ تابىلعان. تۇرعىننىڭ ايتۋىنشا، ول قارۋدى بيىل كوكتەمدە ىلە وزەنى ماڭىندا اڭشىلىق كەزىندە تاۋىپ العان. كەيىن ونى ۇيىنە الىپ كەلىپ، پوليتسياعا حابارلاماي، سەيفتە ساقتاپ كەلگەن.
پوليتسيانىڭ دەرەكتەر بازاسىن تەكسەرۋ ناتيجەسىندە اتالعان قارۋدىڭ 2018 جىلى ۇرلانعانى جانە بۇرىن قوزعالعان قىلمىستىق ءىس بويىنشا زاتتاي دالەلدەمە رەتىندە تىركەلگەنى انىقتالدى. قارۋ تاركىلەنىپ، سوت-بالليستيكالىق ساراپتاما تاعايىندالدى. قازىرگى ۋاقىتتا تەرگەۋشىلەر وقيعانىڭ بارلىق ءمان-جايىن انىقتاپ جاتىر.
پوليتسيا وكىلدەرى تابىلعان قارۋدى ءوز بەتىنشە ساقتاۋعا نەمەسە تاسىمالداۋعا بولمايتىنىن ەسكە سالدى. مۇنداي جاعدايدا ازاماتتار دەرەۋ ىشكى ىستەر ورگاندارىنا حابارلاۋى ءتيىس. ويتكەنى قارۋدى زاڭسىز ساقتاۋ قازاقستان رەسپۋبليكاسىنىڭ زاڭناماسىنا سايكەس جاۋاپكەرشىلىككە اكەلەدى.
