ۋكراينا پرەزيدەنتى 2027 جىلى ەلدە 10 مىڭ شاقىرىمعا دەيىن ۇشا الاتىن درون بولاتىنىن ايتتى، دەپ حابارلايدى “ادىرنا” ۇلتتىق پورتالى.
بۇل تۋرالى زەلەنسكي امەريكالىق قوعام بەلسەندىسى لورا لۋمەرگە بەرگەن سۇحباتىندا ايتتى.
پرەزيدەنتتىڭ سوزىنشە، قازىر ۋكراينا مەن رەسەيدىڭ قارۋلى كۇشتەرىندە 3 مىڭ شاقىرىمنان استام قاشىقتىققا ۇشاتىن دروندار بار. ال بيىلعى جىلدىڭ سوڭىنا قاراي ۋكراينا 4 مىڭ شاقىرىمعا دەيىن ۇشاتىن اپپاراتتاردى پايدالانۋعا نيەتتى.
«كەلەسى جىلى ۇشۋ قاشىقتىعى 5 مىڭنان 10 مىڭ شاقىرىمعا دەيىن جەتەتىن دروندارعا يە بولامىز»، – دەدى ۋكراينا پرەزيدەنتى.
سونىمەن قاتار زەلەنسكي اقش-پەن ۇشقىشسىز ۇشۋ اپپاراتتارىن بىرلەسىپ ءوندىرۋ جونىندە كەلىسىم جاساۋدى جوسپارلاپ وتىرعانىن ايتتى.
ونىڭ سوزىنشە، ۋكراينا تەڭىز، اۋە جانە الىس قاشىقتىققا ۇشاتىن دروندارىن اقش-قا سىناقتان وتكىزۋ ءۇشىن جىبەرگەن. پرەزيدەنت بۇل باعىتتاعى العاشقى كەلىسىمدەر جۇزەگە اسقانىن، ال كەلەسى كەزەڭگە ارنالعان قۇجاتتىڭ دايىن ەكەنىن حابارلادى.
زەلەنسكي سونداي-اق اقش اۋماعىندا درون شىعاراتىن زاۋىت سالۋ جوسپارى بار ەكەنىن اتاپ ءوتتى. ونىڭ ايتۋىنشا، زاماناۋي ۇرىس جاعدايىندا ۇشقىشسىز اپپاراتتاردىڭ تەحنولوگياسى وتە جىلدام وزگەرەتىندىكتەن، ولاردى قويمادا ۇزاق ۋاقىت ساقتاپ قويۋ ءتيىمسىز.
