«AMANAT» پارتياسى ۇكىمەتپەن بىرلەسىپ جۇزەگە اسىرىپ كەلە جاتقان «اۋىل اماناتى» جوباسى بويىنشا اۋقىمدى اقپاراتتىق مارافون جالعاسۋدا. باستى ماقسات – اۋىل تۇرعىندارىنا تابىسىن، ءال-اۋقاتتى مەن ءومىر ءسۇرۋ ساپاسىن ارتتىرۋعا كومەكتەسۋ.
بيىل ساۋىردە مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس «2025 جىلعا دەيىن حالىقتىڭ تابىسىن ارتتىرۋ باعدارلاماسى» بەكىتىلدى. اۋىل تۇرعىندارىنىڭ جىلدىق مولشەرلەمەسى 2,5%-دى قۇرايتىن جەڭىلدەتىلگەن نەسيە الۋىنا، كووپەراتيۆ قۇرۋ جانە تەحنيكانى ليزينگكە رەسىمدەۋ كەزىندە كومەك الۋىنا مۇمكىندىك پايدا بولادى. وسى باعدارلاما اياسىندا پارتيا ۇكىمەتپەن بىرلەسىپ «اۋىل اماناتى» جوباسىن جۇزەگە اسىرۋدا.
«ەلىمىزدەگى ءاربىر ءوڭىردىڭ وزىندىك ەرەكشەلىگى بار. مۇمكىندىكتەرى دە ءار ءتۇرلى. سوندىقتان دا وسى جوبا اياسىندا بارلىق اۋىلدىڭ الەۋەتىن انىقتاپ، تۇرعىندارعا ارى قاراي دايىن باعىتتا كاسىپ اشۋدى ۇيرەتۋدى كوزدەيمىز. بۇل ەلدى مەكەندەردى دامىتۋعا باعىتتالعان ماڭىزدى قادام»، – دەدى بيزنەس-ترەنەر زايرا ۋسۋۆاليەۆا.
28 شىلدەدە پارتيا مۇشەلەرى اۋقىمدى اقپاراتتىق مارافوندى باستادى. سونىڭ بارىسىندا شىعىس قازاقستان، ماڭعىستاۋ، اقمولا، اتىراۋ، قىزىلوردا، باتىس قازاقستان جانە ۇلىتاۋ وبلىستارىنداعى 116 اۋىلدىق وكرۋگتى ارالاپ ۇلگەردى.
ماسەلەن، شىعىس قازاقستان وبلىسىندا پارتيا مۇشەلەرى 18 اۋىلدىق ەلدى مەكەندە بولىپ، 700-گە جۋىق ادام جوبامەن تانىستى.
«بۇل – اۋىل تۇرعىندارىنا اسا قاجەت باعدارلاما. ونداعى باسىم باعىتتارعا، ازاماتتارعا قاراستىرىلعان مۇمكىندىكتەرگە ءدان ريزامىن. وسىنداي جوبالار ارقىلى اۋىل ادامدارى تۇرمىسىن جاقسارتىپ، ءال-اۋقاتىن ارتتىرادى. ەڭ باستىسى، جاپپاي قالاعا كوشۋ ءۇردىسى باسەڭدەيدى. ەلدى مەكەندەردە جۇمىس ورىندارى اشىلادى. اسىرەسە، جاستار قاۋىمىنىڭ تۋعان جەردە تۇراقتاپ قالۋىنا جاعداي جاسالادى»، – دەدى شىعىس قازاقستان وبلىسى ۇلان اۋدانى تۇرعىن اۋىلىنىڭ تۇرعىنى بەكزات نازىربەك.
اقمولا وبلىسىنداعى 42 اۋىلدىق ەلدى مەكەننىڭ تۇرعىندارى تابىستى ارتتىرۋ باعدارلاماسىنىڭ جاي-جاپسارىمەن جانە «اۋىل اماناتى» جوباسىمەن تانىستى. ماسەلەن، اقمولا وبلىسى ەرەيمەنتاۋ اۋدانى تورعاي اۋىلىنىڭ تۇرعىنى ءانۋار ءابدىراحمانوۆتىڭ ايتۋىنشا، كووپەراتيۆتەر مۇشەلەرى ءۇشىن قىزمەت قۇنى نارىقتاعى باعادان الدەقايدا تومەن بولادى.
«اۋىلدىڭ، ونىڭ تۇرعىندارىنىڭ ءومىر ساپاسى مەن ءال-اۋقاتىن جاقسارتۋعا نەگىزدەلگەن باعدارلاما ەكەنىنە كوز جەتكىزدىم. بىرىگىپ كووپەراتيۆ اشامىن، كاسىبىمدى دامىتامىن دەگەن بەلسەندى ازاماتتار ءۇشىن تارتىمدى ۇسىنىستار جاسالىپ جاتىر. شارۋالار تەحنيكانى ليزينگكە رەسىمدەۋ كەزىندە كومەك الا الادى. جىلدىق مولشەرلەمەسى تومەن جەڭىلدەتىلگەن نەسيە دە قاراستىرىلعان»، – دەدى ول.
ءموبيلدى توپتار ەلىمىزدىڭ ءار وڭىرىندەگى 394 اۋىلدىق ەلدى مەكەنگە بارۋدى كوزدەپ وتىر. ساپار 10 قىركۇيەككە دەيىن جالعاسادى.
