ارمەنيانىڭ كاپان قالاسىندا تمد-عا مۇشە مەملەكەتتەردىڭ جاستار ءىسى جونىندەگى كەڭەسىنىڭ وتىرىسى ءوتتى. وعان قازاقستان رەسپۋبليكاسىنىڭ دەلەگاتسياسى قاتىستى، دەپ حابارلايدى "ادىرنا".
ءىس-شارا "تمد جاستار استاناسى" حالىقارالىق جوباسى اياسىندا ۇيىمداستىرىلدى.
وتىرىس بارىسىندا قاتىسۋشى مەملەكەتتەردىڭ وكىلدەرى جاستار ساياساتىن دامىتۋدىڭ باسىم باعىتتارىن، حالىقارالىق ىنتىماقتاستىقتى كەڭەيتۋ، جاستار باستامالارىن قولداۋ، ۆولونتەرلىك قوزعالىستى دامىتۋ جانە بىرلەسكەن جوبالاردى جۇزەگە اسىرۋ ماسەلەلەرىن تالقىلادى.
قازاقستان تاراپى جاستار ساياساتى سالاسىنداعى كوپجاقتى ارىپتەستىكتى ودان ءارى نىعايتۋعا دايىن ەكەنىن جەتكىزدى.
قازاقستاندىق دەلەگاتسيا تمد-عا مۇشە مەملەكەتتەردىڭ جاستار قوعامدىق ۇيىمدارىنىڭ فورۋمىنا جانە كەڭەس مۇشەلەرىنىڭ پانەلدىك پىكىرتالاسىنا قاتىستى. باسقوسۋلاردا تمد ەلدەرىنىڭ جاستار ۇيىمدارى اراسىنداعى ىنتىماقتاستىقتى ودان ءارى دامىتۋ جولدارى ءسوز بولدى.
جيىن قورىتىندىسىندا تمد-عا مۇشە مەملەكەتتەردىڭ جاستار ءىسى جونىندەگى كەڭەسىنە توراعالىق ەتۋ كەزەگى قازاقستانعا ءوتتى.
