الماتىدا جىلۋ جۇيەسىن جاڭارتۋعا باعىتتالعان ءىرى جوبا باستالادى. بۇل جۇمىستار «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا ىسكە اسىرىلماق.
جوبانى قارجىلاندىرۋ ءۇشىن «قازاقستان دامۋ بانكى» مەن «الماتى ەلەكتر ستانتسيالارى» اكتسيونەرلىك قوعامى ءوزارا الدىن الا كەلىسىمگە قول قويدى. وسى كەلىسىمنىڭ ارقاسىندا 2-جىلۋ-ەلەكتر ورتالىعى مەن باتىس جىلۋ كەشەنى اراسىنداعى ماگيسترالدى جىلۋ قۇبىرلارى قايتا جوندەۋدەن وتەدى. بۇل جوبا قالانىڭ ەڭ ەسكىرگەن جىلۋ جەلىلەرىنىڭ ءبىرىن جاڭارتۋعا باعىتتالعان. قازىر بۇل جىلۋ جەلىسىنىڭ 83%-ى توزىپ تۇر. سونىڭ سالدارىنان اپات جيىلەپ، ۇيلەرگە جىلۋ دۇرىس جەتپەي قالۋ قاۋپى وتە جوعارى.
جوبا اياسىندا الماتىنىڭ اۋەزوۆ جانە الاتاۋ اۋداندارىنداعى 19,6 شاقىرىم قۇبىر تولىعىمەن قايتا جوندەۋدەن وتەدى. جۇمىس بارىسىندا ەسكىرگەن ينجەنەرلىك جەلىلەر اۋىستىرىلىپ، جىلۋ تراسساسىنىڭ جاڭا جەراستى جانە جەرۇستى بولىكتەرى سالىنادى. سونىمەن قاتار زاماناۋي پاۆيلوندار، ەستاكادالار مەن باسقا دا قاجەتتى قۇرال-جابدىقتار ورناتىلىپ، بۇل جۇيە قولدانىستاعى قالالىق ينجەنەرلىك جەلىلەرگە قوسىلادى.
جۇمىستار اياقتالعان سوڭ 2-جىلۋ-ەلەكتر ورتالىعىنا (جەو-2) قوسىلعان تۇتىنۋشىلارعا جىلۋ وتە ءتيىمدى تۇردە بەرىلە باستايدى. بۇل ماگيسترال ساعاتىنا 606 گكال جىلۋ جۇكتەمەسىن وتكىزە الادى، ال جىل سايىن حالىققا 3 ميلليون گكال-دان استام جىلۋ ەنەرگياسىن تاراتادى.
جوبا ىسكە اسسا، جىلىتۋ ماۋسىمىندا اپاتتاردىڭ كەسىرىنەن جىلۋدىڭ ءوشىپ قالۋ قاۋپى ەداۋىر ازايىپ، قالا تۇرعىندارىنا كورسەتىلەتىن كوممۋنالدىق قىزمەتتىڭ ساپاسى ارتادى.
جوبانىڭ جالپى قۇنى – 61,1 ملرد تەڭگە. جۇمىستىڭ جوسپارلانعان ۋاقىتقا سايكەس اياقتالۋىن قامتاماسىز ەتۋ ءۇشىن قازاقستان دامۋ بانكى 26,4 ملرد تەڭگەگە دەيىن قارجى بولەدى. قايتا جوندەۋ جۇمىستارىن 2030 جىلدىڭ 31 جەلتوقسانىنا دەيىن اياقتاۋ جوسپارلانعان.
بۇل جوبا – ەلىمىزدىڭ «ەنەرگەتيكالىق جانە كوممۋنالدىق سەكتورلارىن جاڭعىرتۋدى» كوزدەيتىن اۋقىمدى ۇلتتىق جوبانىڭ ءبىر بولىگى. ونىڭ باستى ماقساتى – حالىقتى جىلۋمەن، ەلەكتر ەنەرگياسىمەن، سۋمەن جانە كارىز جۇيەسىمەن ۇزدىكسىز قامتاماسىز ەتىپ، قۇبىرلار مەن جەلىلەردىڭ ەسكىرۋىن ازايتۋ جانە كوممۋنالدىق قىزمەت ساپاسىن جاقسارتۋ.
الماتىداعى جىلۋ ماگيسترالىن قايتا جوندەۋ – قازاقستان دامۋ بانكىنىڭ (قدب) وسى ۇلتتىق جوبا اياسىندا جۇزەگە اسىرىپ جاتقان كەزەكتى باستاماسى. بۇعان دەيىن بانكتىڭ قولداۋىمەن قاراعاندى جانە جەتىسۋ وبلىستارىنداعى ەلەكتر جەلىلەرىن جاڭارتۋ جۇمىستارى قارجىلاندىرىلا باستاعان ەدى.
