Almatyda jylu jüiesın jaŋartuǧa baǧyttalǧan ırı joba bastalady. Būl jūmystar «Energetikalyq jäne kommunaldyq sektorlardy jaŋǧyrtu» ūlttyq jobasy aiasynda ıske asyrylmaq.
Jobany qarjylandyru üşın «Qazaqstan Damu Bankı» men «Almaty elektr stansiialary» aksionerlık qoǧamy özara aldyn ala kelısımge qol qoidy. Osy kelısımnıŋ arqasynda 2-jylu-elektr ortalyǧy men Batys jylu keşenı arasyndaǧy magistraldy jylu qūbyrlary qaita jöndeuden ötedı. Būl joba qalanyŋ eŋ eskırgen jylu jelılerınıŋ bırın jaŋartuǧa baǧyttalǧan. Qazır būl jylu jelısınıŋ 83%-y tozyp tūr. Sonyŋ saldarynan apat jiılep, üilerge jylu dūrys jetpei qalu qaupı öte joǧary.
Joba aiasynda Almatynyŋ Äuezov jäne Alatau audandaryndaǧy 19,6 şaqyrym qūbyr tolyǧymen qaita jöndeuden ötedı. Jūmys barysynda eskırgen injenerlık jelıler auystyrylyp, jylu trassasynyŋ jaŋa jerasty jäne jerüstı bölıkterı salynady. Sonymen qatar zamanaui pavilondar, estakadalar men basqa da qajettı qūral-jabdyqtar ornatylyp, būl jüie qoldanystaǧy qalalyq injenerlık jelılerge qosylady.
Jūmystar aiaqtalǧan soŋ 2-jylu-elektr ortalyǧyna (JEO-2) qosylǧan tūtynuşylarǧa jylu öte tiımdı türde berıle bastaidy. Būl magistral saǧatyna 606 Gkal jylu jüktemesın ötkıze alady, al jyl saiyn halyqqa 3 million Gkal-dan astam jylu energiiasyn taratady.
Joba ıske assa, jylytu mausymynda apattardyŋ kesırınen jyludyŋ öşıp qalu qaupı edäuır azaiyp, qala tūrǧyndaryna körsetıletın kommunaldyq qyzmettıŋ sapasy artady.
Jobanyŋ jalpy qūny – 61,1 mlrd teŋge. Jūmystyŋ josparlanǧan uaqytqa säikes aiaqtaluyn qamtamasyz etu üşın Qazaqstan Damu Bankı 26,4 mlrd teŋgege deiın qarjy böledı. Qaita jöndeu jūmystaryn 2030 jyldyŋ 31 jeltoqsanyna deiın aiaqtau josparlanǧan.
Būl joba – elımızdıŋ «Energetikalyq jäne kommunaldyq sektorlaryn jaŋǧyrtudy» közdeitın auqymdy Ūlttyq jobanyŋ bır bölıgı. Onyŋ basty maqsaty – halyqty jylumen, elektr energiiasymen, sumen jäne kärız jüiesımen üzdıksız qamtamasyz etıp, qūbyrlar men jelılerdıŋ eskıruın azaitu jäne kommunaldyq qyzmet sapasyn jaqsartu.
Almatydaǧy jylu magistralın qaita jöndeu – Qazaqstan Damu Bankınıŋ (QDB) osy Ūlttyq joba aiasynda jüzege asyryp jatqan kezektı bastamasy. Būǧan deiın banktıŋ qoldauymen Qaraǧandy jäne Jetısu oblystaryndaǧy elektr jelılerın jaŋartu jūmystary qarjylandyryla bastaǧan edı.
