كوكشەتاۋ قالاسىندا «بابالار جولىمەن» اۆتوشەرۋىنە قاتىسۋشىلاردى قارسى الۋ ءراسىمى مەن «ابىلاي حان جانە مارال يشان اۋلەتتەرىنىڭ مەملەكەتتىلىك پەن رۋحانياتتاعى تاريحي بىرلىگى» تاقىرىبىنداعى دوڭگەلەك ۇستەل جوعارى دەڭگەيدە ءوتتى. تاعىلىمى مول جيىن «دوستىق ۇيىندە» ۇيىمداستىرىلىپ، وعان زيالى قاۋىم وكىلدەرى، تاريحشىلار، قوعام قايراتكەرلەرى، ۇكىمەتتىك ەمەس ۇيىم جەتەكشىلەرى، جاستار مەن قالا جۇرتشىلىعى قاتىستى.
اتالعان شارا ۇلتتىق تاريحي سانانى جاڭعىرتۋ، ۇرپاقتار ساباقتاستىعىن نىعايتۋ جانە ەلدىك رۋحتى دارىپتەۋ ماقساتىندا وتكىزىلدى. كوكشەتاۋ – قازاق مەملەكەتتىلىگىنىڭ التىن دىڭگەكتەرىنىڭ ءبىرى سانالاتىن كيەلى مەكەن. بۇل ءوڭىر – ءۇش ءجۇزدىڭ باسىن قوسقان ابىلاي حاننىڭ ورداسى تىگىلگەن، كەنەسارى حاننىڭ كىندىگى كەسىلگەن، ەلدىك پەن ەرلىكتىڭ ءىزى قالعان قاسيەتتى توپىراق. وسىنداي تاريحي كەڭىستىكتە وتكەن جيىننىڭ ماڭىزى دا ايرىقشا بولدى.
شارا اياسىندا ء«ۇش جۇزگە ءپىر اتانعان اۋليە» اتتى كىتاپتىڭ تۇساۋكەسەر ءراسىمى ءوتتى. ەڭبەكتە مارال يشاننىڭ ءومىر جولى، ونىڭ ەل بىرلىگى مەن رۋحانياتتى ساقتاۋداعى ءرولى كەڭىنەن قامتىلعان. كىتاپتىڭ جارىق كورۋى – ۇلتتىق تاريحتاعى رۋحاني تۇلعالاردىڭ مۇراسىن قايتا زەردەلەۋگە باعىتتالعان ماڭىزدى قادام.
دوڭگەلەك ۇستەلدە ءسوز العان بەلگىلى عالىمدار مەن قوعام قايراتكەرلەرى ابىلاي حان داۋىرىندەگى مەملەكەتتىلىك يدەياسى مەن مارال يشان اۋلەتىنىڭ رۋحاني ىقپالىنىڭ ساباقتاستىعىنا توقتالدى. شوقان ءۋاليحانوۆ اتىنداعى كوكشەتاۋ ۋنيۆەرسيتەتىنىڭ پروفەسسورى، ادەبيەتشى-تاريحشى ءسابيت جامبەك تاريحي دەرەكتەر نەگىزىندە اتالعان تۇلعالاردىڭ ەل تاعدىرىنداعى ورنىن جان-جاقتى سارالادى.
جيىندا ۇلتتىق رۋحانياتتىڭ بۇگىنگى قوعامداعى ورنى دا كەڭىنەن قوزعالدى. قاتىسۋشىلار قازىرگى جاھاندانۋ داۋىرىندە ۇلتتىق قۇندىلىقتاردى ساقتاۋ، تاريحي سانانى جاڭعىرتۋ ماسەلەلەرىنىڭ وزەكتىلىگىن اتاپ ءوتتى. اسىرەسە، جاس ۇرپاقتىڭ ءوز تامىرىنان اجىراماۋى، ءتول تاريحىن تەرەڭ تانۋى – ەل بولاشاعىنىڭ كەپىلى ەكەنى باسا ايتىلدى.
سونىمەن قاتار، ناۋان حازىرەت پەن مارال يشان سىندى تۇلعالاردىڭ ۇلتتى ساقتاپ قالۋداعى ەڭبەگى ەرەكشە اتالىپ ءوتتى. ولاردىڭ رۋحاني مۇراسى – تەك وتكەننىڭ ەنشىسى ەمەس، بۇگىنگى قوعام ءۇشىن دە ماڭىزدى باعدار ەكەنى جيىن بارىسىندا ايقىن كورىندى.
اۆتوشەرۋ جەتەكشىسى، «مارال بابا» قايىرىمدىلىق قورىنىڭ پرەزيدەنتى مۇحامەدحان قاسىمقانۇلى ءوز سوزىندە بابالار اماناتىن ۇلىقتاۋ – ۇلت الدىنداعى قاسيەتتى بورىش ەكەنىن اتاپ ءوتتى. ونىڭ ايتۋىنشا، مۇنداي شارالار ەل بىرلىگىن نىعايتىپ، تاريحي جادتى جاڭعىرتۋعا قىزمەت ەتەدى.
كەزدەسۋ بارىسىندا ەركىن پىكىر الماسۋ ۇيىمداستىرىلىپ، قاتىسۋشىلار ۇلتتىق تاربيە، رۋحاني ساباقتاستىق، تاريحي تۇلعالاردى دارىپتەۋ ماسەلەلەرى توڭىرەگىندە وي ءبولىستى.
جيىن سوڭىندا ۇيىمداستىرۋشىلار مۇنداي تاعىلىمدى شارالاردىڭ الداعى ۋاقىتتا دا جالعاسىن تاباتىنىن جەتكىزدى. راسىندا، ۇلىلاردىڭ ونەگەسىن ۇلىقتاۋ – ۇلتتىڭ ۇلى مۇراتىنا قىزمەت ەتەتىن ماڭىزدى ءىس. بابالار اماناتىنا ادالدىق تانىتىپ، تاريحي تامىرىمىزدى تەرەڭ تانۋ – تاۋەلسىز ەلىمىزدىڭ بەرىك ىرگەتاسى بولماق.
