رەسەي بيلىگى Telegram مەسسەندجەرىنىڭ نەگىزىن قالاۋشى پاۆەل دۋروۆقا حالىقارالىق ىزدەۋ جاريالادى. بۇل تۋرالى ەلدىڭ فەدەرالدىق قاۋىپسىزدىك قىزمەتى (فقق) ايتتى، دەپ حابارلايدى «ادىرنا» ءتىلشىسى.
فقق قوعاممەن بايلانىس ورتالىعىنىڭ مالىمەتىنشە، Telegram اكىمشىلىگى ۋكراينا ارنايى قىزمەتتەرى، تەرروريستىك جانە ەكسترەميستىك ۇيىمدار بەلسەندى پايدالانعان كوپتەگەن ارنا، چاتتار مەن بوتتاردى جويماعان دەگەن كۇدىككە ىلىنگەن.
رەسەي قاۋىپسىزدىك ورگاندارىنىڭ پىكىرىنشە، اتالعان رەسۋرستار ەل اۋماعىندا تەرروريستىك اكتىلەردى دايىنداۋعا جانە كيبەرالاياقتىق ارەكەتتەردى جۇزەگە اسىرۋعا ىقپال ەتكەن. مۇنداي ارەكەتتەردىڭ سالدارىنان كوپتەگەن ادام، سونىڭ ىشىندە ايەلدەر مەن بالالار زارداپ شەككەن.
رەسەي تەرگەۋ كوميتەتى Telegram-داعى «دايۆينچيك/Leo» چات-بوتى ارقىلى جاسوسپىرىمدەردى تەرروريزم مەن ديۆەرسيالىق ارەكەتتەرگە تارتۋ فاكتىلەرى بويىنشا قىلمىستىق ىستەردى دە تەرگەپ جاتقانىن حابارلادى. فقق دەرەگىنە سايكەس، ءبىر جىل ىشىندە بۇل بوت ارقىلى قىلمىستىق ارەكەتتەرگە 12 مەن 22 جاس ارالىعىنداعى 46 رەسەيلىك تارتىلعان.
اقپان ايىندا رەسەيدىڭ مەملەكەتتىك اقپارات قۇرالدارى پاۆەل دۋروۆقا قاتىستى تەرروريزمگە جاردەمدەسۋ بابى بويىنشا قىلمىستىق ءىس قوزعالعانىن حابارلاعان بولاتىن.
ءوز كەزەگىندە پاۆەل دۋروۆ بۇل ءىستىڭ ساياسي استارى بار ەكەنىن مالىمدەدى. ونىڭ ايتۋىنشا، بيلىك وكىلدەرى رەسەيلىكتەردىڭ Telegram-عا قولجەتىمدىلىگىن شەكتەۋ ءۇشىن ءتۇرلى سىلتاۋ ىزدەگەن.
