Telegram نەگىزىن قالاۋشى پاۆەل دۋروۆ استانادا وتكەن جاساندى ينتەللەكت بويىنشا حالىقارالىق IOAI 2026 وليمپياداسىنىڭ جۇلدەگەرلەرىنە بەرىلەتىن سىياقىلار تۋرالى مالىمدەدى. جۇلدە قورىنىڭ جالپى قۇنى 106,5 مىڭ دوللاردان اسادى، دەپ حابارلايدى «ادىرنا» ءتىلشىسى.
ايتۋىنشا، Telegram كومپانياسى جارىس ۇيىمداستىرۋشىلارىمەن بايلانىسقا شىققان. جەڭىمپازدارعا سىياقىلار كەلەسى اپتادا قاۋىپسىز تاسىلمەن تابىستالماق.
«جەكە ەسەپتە ەكىنشى ورىن العان قازاقستاندىق داۋجان بەكەتوۆ ءۇشىن قۋانىشتىمىن. ءبىز ۇيىمداستىرۋشىلارمەن بايلانىسىپ، كەلەسى اپتادا Telegram اتىنان جەڭىمپازدارعا سىيلىقتاردى تابىستاۋدى جوسپارلاپ وتىرمىز»، – دەپ جازدى ول جەلىدەگى پاراقشاسىندا.
ەسكە سالايىق، جاساندى ينتەللەكت بويىنشا ءۇشىنشى حالىقارالىق وليمپيادا 2–8 تامىز ارالىعىندا استانادا وتكەن بولاتىن. وعان الەمنىڭ 106 ەلىنەن 500-دەن استام وقۋشى قاتىسقان.
بۇعان دەيىن قازاقستان قۇراماسىنىڭ سەگىز مۇشەسى دە IOAI 2026 وليمپياداسىندا مەدالعا يە بولعانىن جازعان ەدىك.
