پرەزيدەنت استانادا ءوتىپ جاتقان «بولاشاق ويىندارى – 2026» حالىقارالىق مۋلتيسپورت ءتۋرنيرىنىڭ اشىلۋ سالتاناتىندا ءسوز سويلەدى. بۇل تۋرالى بۇگىن، 29 شىلدەدە اقوردا جازدى، دەپ حابارلايدى «ادىرنا» ءتىلشىسى.
«بارىس ارەنا» ستاديونىندا ۇيىمداستىرىلعان ءىس-شاراعا وزبەكستان پرەزيدەنتى شاۆكات ميرزيوەۆ، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون جانە باسقا دا رەسمي تۇلعالار قۇرمەتتى قوناق رەتىندە قاتىستى.
جيىندا سويلەگەن سوزىندە قاسىم-جومارت توقاەۆ باۋىرلاس ەلدىڭ باسشىلارىنا، قۇرمەتتى قوناقتار مەن حالىقارالىق تۋرنيرگە قاتىسۋ ءۇشىن ەلىمىزگە كەلگەن سپورتشىلارعا ريزاشىلىعىن ءبىلدىردى.
مەملەكەت باسشىسى سپورتتىڭ كۇش-قۋاتى، اقىل-وي مەن تسيفرلىق ءداۋىردىڭ وراسان الەۋەتى ۇيلەسىم تاپقان تۋرنير بارشاعا ورتاق جاسامپازدىق ۇستانىمىمەن تولىق ۇندەسەتىنىن ايتتى.
«بۇل تۋرنير كەرەعار دۇنيەلەردى ءبىر ارناعا توعىستىرادى. ونىڭ نەگىزىندە شىنايى جانە ۆيرتۋالدى الەم اراسىنداعى اقىلعا قونىمدى تەپە-تەڭدىك جاتىر. بۇگىن وسى ارەناعا نەگىزىنەن جاستار جينالىپ وتىر. سىزدەر ءبىلىمدى، تالانتتى، ەڭبەكقور، تالاپتى بولساڭىزدار، بولاشاقتىڭ ىرگەتاسى بەكەمدەلە تۇسەتىنى انىق. الدا وزدەرىڭىزدى بيىك بەلەستەرگە باستايتىن سوقتىقپالى-سوقپاقسىز جول كۇتىپ تۇر. وي-پىكىرى ورتاق، مۇددەسى ءبىر، سەنىمدى سەرىكتەر جاندارىڭىزدان تابىلعاندا عانا بۇل جولدى ەڭسەرۋ وڭاي بولماق. ويىنعا قاتىسۋشىلاردىڭ ارقايسىسى تىڭعىلىقتى دايىندىقتان ءوتتى. ولار ءوز كوماندالارىنىڭ نامىسىن ابىرويمەن قورعاۋعا ءازىر. سىزدەر «جۇزدەن جۇيرىك، مىڭنان تۇلپار» شىعىپ، جاڭا دوستار تاۋىپ، كەلەشەگى زور جوبالاردى بىرلەسە قولعا الاسىزدار دەپ سەنەمىن. سەبەبى، «بولاشاق ويىندارىنىڭ» باستى ميسسياسى – ادامداردى جاڭا جەتىستىكتەر جولىندا جۇمىلدىرۋ جانە جىگەرلەندىرۋ. «بولاشاق ويىندارى» ەلدەرىمىزدىڭ اراسىنداعى ىنتىماقتاستىقتىڭ، دوستىق پەن كەلىسىمنىڭ «التىن كوپىرىنە» اينالادى دەپ سەنەمىن»،– دەدى قاسىم-جومارت توقاەۆ.
پرەزيدەنت سپورتشىلارعا ساتتىلىك تىلەپ، ۇيىمداستىرۋشىلارعا، سەرىكتەستەرگە، تورەشىلەر مەن جاتتىقتىرۋشىلارعا، ءتيىستى ماماندارعا، ەرىكتىلەرگە جانە وسى تاماشا سپورت مەرەكەسىن وتكىزۋگە اتسالىسقان بارشا ازاماتقا شىنايى ريزاشىلىعىن ءبىلدىردى.
اشىلۋ سالتاناتىندا رەسەي پرەزيدەنتى ۆلاديمير ءپۋتيننىڭ تۋرنير قاتىسۋشىلارىنا بەينەۇندەۋى كورسەتىلدى.
سونىمەن قاتار جيىندا بولاشاق ويىندارىنىڭ باس ديرەكتورى دەن مەركلي ءسوز سويلەدى.
بۇدان سوڭ كورەرمەندەر تەاترلاندىرىلعان شوۋ مەن وتاندىق ەسترادا جۇلدىزدارى قاتىسقان كونتسەرتتىك باعدارلامانى تاماشالادى.
29 شىلدە – 9 تامىز ارالىعىندا استانا قالاسىندا العاش رەت كيبەرسپورت پەن سپورتتىڭ ءداستۇرلى تۇرلەرىن جانە جاڭا تەحنولوگيانى ۇشتاستىرعان حالىقارالىق تۋرنير وتەدى. بيىلعى سايىستارعا 34 ەلدەن كەلگەن 800-دەن استام سپورتشى قاتىسادى.
استاناداعى تۋرنيردە سپورتشىلار فيدجيتال-فۋتبول، فيدجيتال-باسكەتبول، فيدجيتال-جەكپە-جەك، فيدجيتال-شۋتەر، فيدجيتال-بي، Dota 2, Mobile Legends: Bang Bang جانە PUBG: Battlegrounds سەكىلدى 8 باعىت بويىنشا كۇش سىناسادى.
