1 تامىزدا ازەربايجاندا ازەربايجان ءالىپبيى مەن ءتىلى كۇنى اتاپ وتىلەدى، دەپ حابارلايدى "ادىرنا" ءتىلشىسى Report-قا سىلتەپ.
بۇل اتاۋلى كۇن 2001 جىلعى 9 تامىزدا گەيدار اليەۆتىڭ جارلىعىمەن بەكىتىلگەن.
2001 جىلدىڭ تامىز ايىندا ەلدە لاتىن گرافيكاسىنا نەگىزدەلگەن ازەربايجان الىپبيىنە كوشۋ تولىق اياقتالدى. جاڭا ءالىپبيدىڭ ەنگىزىلۋى تاۋەلسىز ازەربايجاننىڭ قوعامدىق-ساياسي ءومىرى مەن ۇلتتىق جازبا مادەنيەتى تاريحىنداعى ماڭىزدى كەزەڭدەردىڭ ءبىرى رەتىندە باعالانادى.
ازەربايجان ءتىلىنىڭ مەملەكەتتىك مارتەبەسىن نىعايتۋ باعىتىنداعى ماڭىزدى قادامداردىڭ ءبىرى 1978 جىلى جاسالدى. سول كەزدە ازەربايجان كسر كونستيتۋتسياسىنا رەسپۋبليكانىڭ مەملەكەتتىك ءتىلى رەتىندە ازەربايجان ءتىلىنىڭ مارتەبەسىن بەكىتەتىن وزگەرىس ەنگىزىلدى.
كەيىن گەيدار اليەۆ مەملەكەتتىك ءتىلدى قولدانۋدى جەتىلدىرۋگە باعىتتالعان بىرقاتار جارلىقتارعا قول قويدى. ال 2003 جىلى «ازەربايجان رەسپۋبليكاسىنداعى مەملەكەتتىك ءتىل تۋرالى» زاڭ كۇشىنە ەنىپ، مەملەكەتتىك ءتىل ساياساتىنىڭ نەگىزگى باعىتتارى ايقىندالدى.
پرەزيدەنت يلحام اليەۆ بۇل ساياساتتى جالعاستىرىپ، ازەربايجان تىلىندەگى كىتاپتاردى لاتىن قارپىمەن جاپپاي باسىپ شىعارۋعا، ۇلتتىق ەنتسيكلوپەديانى ازىرلەۋگە جانە الەم ادەبيەتىنىڭ ۇزدىك شىعارمالارىن ازەربايجان تىلىندە جاريالاۋعا باعىتتالعان شەشىمدەر قابىلدادى.
سونداي-اق 2013 جىلى ازەربايجان ءتىلىن جاھاندانۋ تالاپتارىنا ساي دامىتۋعا ارنالعان مەملەكەتتىك باعدارلاما بەكىتىلسە، 2018 جىلى مەملەكەتتىك ءتىلدىڭ قولدانىسىن جەتىلدىرۋ جانە ازەربايجان ءتىلىنىڭ تازالىعىن ساقتاۋ جونىندەگى قوسىمشا شارالار قابىلداندى.
