قارجىلىق مونيتورينگ اگەنتتىگى شامامەن 140 مىڭ ازاماتتى مەديتسينالىق ۇيىمدارعا جالعان تىركەۋ جانە كورسەتىلمەگەن مەديتسينالىق قىزمەتتەر تۋرالى جالعان مالىمەت ەنگىزۋ ارقىلى الەۋمەتتىك مەديتسينالىق ساقتاندىرۋ قورىنان زاڭسىز قارجى الۋ سحەمالارىن انىقتادى، دەپ حابارلايدى «ادىرنا» ءتىلشىسى.
قما مالىمەتىنشە، قازىرگى ۋاقىتتا اتالعان فاكتىلەر بويىنشا 36 قىلمىستىق ءىس تەرگەلىپ جاتىر. الدىن الا ەسەپ بويىنشا مەملەكەتكە كەلتىرىلگەن شىعىن كولەمى 3,5 ميلليارد تەڭگەدەن اسادى.
قما تۇركىستان وبلىسىندا جەتىساي كوپسالالى اۋداندىق اۋرۋحاناسىنىڭ لاۋازىمدى تۇلعالارىنا قاتىستى تەرگەۋ جۇرگىزىلىپ جاتقانىن ايتتى. تەرگەۋ دەرەكتەرىنە سايكەس، ءمامس اياسىندا بولىنگەن قاراجات ءىس جۇزىندە ەشقانداي قىزمەت كورسەتپەگەن جانە تاۋار جەتكىزبەگەن 20-دان استام جەكە كاسىپكەردىڭ ەسەپشوتتارىنا اۋدارىلعان. ناتيجەسىندە مەملەكەتكە 501 ميلليون تەڭگەدەن استام شىعىن كەلتىرىلگەن. ءىس بويىنشا ەكى كۇدىكتى قاماۋعا الىنعان.
سونداي-اق استانادا «Forte Clinic» جەكە كلينيكاسىنىڭ باسشىسى الەۋمەتتىك مەديتسينالىق ساقتاندىرۋ قورىنان زاڭسىز قارجى الۋ سحەماسىن ۇيىمداستىرعانى ءۇشىن 5 جىلعا باس بوستاندىعىنان ايىرىلعان. ونىڭ سىبايلاسى – دەنساۋلىق ساقتاۋدى دامىتۋدىڭ ۇلتتىق عىلىمي ورتالىعىنىڭ قىزمەتكەرى ازاماتتاردى تىركەۋ تۋرالى وتىنىمدەردى زاڭسىز ماقۇلداعانى ءۇشىن 3 جىلعا سوتتالعان. تەرگەۋ بارىسىندا كلينيكاعا 15 مىڭنان استام ازاماتتىڭ زاڭسىز تىركەلگەنى جانە 79 ميلليون تەڭگەنىڭ جالعان مەديتسينالىق قىزمەتى راسىمدەلگەنى انىقتالعان.
ال الماتى وبلىسىندا «Mydental.kz» جانە «ستوماتولوگيا Dr. Nurzhanova» كلينيكالارىنىڭ باسشىسى ستوماتولوگيالىق قىزمەت كورسەتۋ كەزىندە الاياقتىق جاساعانى ءۇشىن 4 جىلعا سوتتالعان. تەرگەۋ مالىمەتىنشە، پاتسيەنتتەرگە ناقتى قىزمەت كورسەتىلمەگەن، ال قۇجاتتاردى راسىمدەۋ ءۇشىن دارىگەرلەردىڭ تىركەلگىلەرى مەن كامەلەتكە تولماعانداردىڭ جەكە دەرەكتەرى پايدالانىلعان. ناتيجەسىندە مەملەكەتكە 66 ميلليون تەڭگە شىعىن كەلتىرىلگەن.
قارجىلىق مونيتورينگ اگەنتتىگى بۇل باعىتتاعى جۇمىستاردىڭ جالعاسىپ جاتقانىن مالىمدەدى.
