پەتروپاۆل قالاسىنداعى «قۇلاگەر» حوككەي كلۋبىنىڭ جەتەكشىسى سەرگەي فيل الاياقتىق جاسادى دەگەن كۇدىككە ءىلىندى، دەپ حابارلايدى "ادىرنا" ۇلتتىق پورتالى Kazinform-عا سىلتەمە جاساپ.
ول ءىز-ءتۇزسىز جوعالىپ كەتكەن، قازىرگى ۋاقىتتا پوليتسيا ونى ىزدەستىرىپ جاتىر، دەپ حابارلايدى.
«پوليتسياعا “قۇلاگەر” كومانداسىنىڭ حوككەيشىلەرى جۇگىندى. بۇل دەرەك بويىنشا 45 جاستاعى استانا تۇرعىنىنا قاتىستى سوتقا دەيىنگى تەرگەۋ باستالدى. قازىر ونىڭ تۇرعان جەرىن انىقتاۋ جانە ۇستاۋ بويىنشا جەدەل-ىزدەستىرۋ شارالارى جۇرگىزىلۋدە»، – دەدى پەتروپاۆل قالالىق پوليتسيا باسقارماسىنىڭ تەرگەۋ ءبولىمىنىڭ باستىعى ازامات بەكتۇرعانوۆ.
ءىستىڭ وزگە ءمان-جايلارى ازىرگە جاريا ەتىلمەگەن.
سەرگەي فيل 2024 جىلدىڭ جەلتوقسانىندا «قۇلاگەر» حوككەي كلۋبىنا جۇمىسقا قابىلدانعان. ال 24 قىركۇيەكتەن باستاپ جۇمىسقا شىقپاي، ءىز-ءتۇزسىز جوعالعان.
بەيرەسمي دەرەكتەرگە سۇيەنسەك، سەرگەي فيل لەگيونەرلەردەن 500 مىڭنان 1 ميلليون تەڭگەگە دەيىن اقشا العان. ول بۇل سوماعا ولاردىڭ رەسەي ازاماتتىعىنان قازاقستان ازاماتتىعىنا تەزىرەك وتۋىنە كومەكتەسەمىن دەپ ۋادە بەرگەن. الايدا اقشانى العان سوڭ جوعالىپ كەتكەن. قازىر ءتورت جابىرلەنۋشى پوليتسياعا ارىز تۇسىرگەن.
Halyqstan Telegram-ارناسىنىڭ حابارلاۋىنشا، ءفيلدىڭ قىلمىستىق وتكەنى بولۋى مۇمكىن. 7152.kz پورتالى تاراتقان مالىمەتكە سايكەس، وسىنداي اتى-ءجونى بار ادام بۇعان دەيىن الاياقتىق، ۇرلىق جانە زورلىق قولدانۋ قىلمىستارى بويىنشا ىزدەۋدە بولعان.
الدىن الا مالىمەتتەرگە قاراعاندا، ىزدەۋدەگى ادام – چەليابى وبلىسىنىڭ مياسس قالاسىنىڭ تۋماسى، ول ءتۇرلى اتپەن ارەكەت ەتىپ، پاتەر جالداپ، وزگەنىڭ مۇلكىن ۇرلاپ، كەيىن جاسىرىنىپ جۇرگەن.
قازىرگى تاڭدا رەسمي تۇردە ىزدەۋدەگى ادام مەن «قۇلاگەر» حوككەي كلۋبىنىڭ قىزمەتكەرى سەرگەي فيل — ءبىر ادام ەكەنى دالەلدەنگەن جوق. بۇعان دەيىن كلۋب باسشىلىعى ونىڭ وتكەنىنە قاتىستى ەشتەڭە بىلمەگەنىن جانە قۇقىق قورعاۋ ورگاندارىنان ەشقانداي شاعىم تۇسپەگەنىن مالىمدەدى.
