مەملەكەت باسشىسى قاسىم-جومارت توقاەۆ ارمەنيا پرەمەر-ءمينيسترى نيكول پاشينيانمەن تەلەفون ارقىلى سويلەستى، دەپ حابارلايدى "ادىرنا".
قاسىم-جومارت توقاەۆ نيكول پاشينياندى ارمەنيا پرەمەر-ءمينيسترى لاۋازىمىنا قايتا تاعايىندالۋىمەن قۇتتىقتاپ، ارميان حالقىنىڭ يگىلىگى جولىنداعى مەملەكەتتىك قىزمەتىنە تابىس تىلەدى.
نيكول پاشينيان جىلى لەبىزگە ريزاشىلىعىن ءبىلدىرىپ، قازاقستان پرەزيدەنتى مەن حالقىنا قۇرىلتاي سايلاۋىن ءساتتى وتكىزۋگە تىلەكتەستىگىن جەتكىزدى.
پرەزيدەنت پەن پرەمەر-مينيستر قازاق-ارميان قارىم-قاتىناسى قارقىندى تۇردە دامىپ كەلە جاتقانىنا كوڭىل تولاتىنىن اتاپ ءوتىپ، ەكى ەل اراسىنداعى سان قىرلى ىنتىماقتاستىقتى تەرەڭدەتۋگە دايىن ەكەندەرىن راستادى.
سونىمەن قاتار بۇعان دەيىن، سونىڭ ىشىندە بىلتىر قاراشا ايىندا ارمەنيا ۇكىمەتى باسشىسىنىڭ استاناعا جاساعان رەسمي ساپارى كەزىندە قول جەتكىزىلگەن ۋاعدالاستىقتاردى ىسكە اسىرۋ بارىسى تالقىلاندى. ساۋدا-ەكونوميكالىق، كولىك-لوگيستيكالىق جانە مادەني-گۋمانيتارلىق سالالارداعى ىقپالداستىقتى كەڭەيتۋگە باسا نازار اۋدارىلدى.
