اقتوبە وبلىسىنداعى سۋ قۇبىرى جەلىلەرىنىڭ قۇرىلىسىنا قايتارىلعان اكتيۆتەر قاراجاتى ەسەبىنەن 5 ملرد تەڭگە ءبولىندى. بۇل تۋرالى بۇگىن، 5 تامىزدا ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«اقتوبە وبلىسىنداعى سارىبۇلاق جەر استى سۋلارى كەن ورنىنان توپتىق سۋ قۇبىرىن سالۋعا ارناۋلى مەملەكەتتىك قوردان 5 ملرد تەڭگە ءبولىندى. جوبا تۇرعىن ءۇي قۇرىلىسى قارقىندى جۇرگىزىلىپ، كوممۋنالدىق جەلىلەرگە تۇسەتىن جۇكتەمە ارتىپ كەلە جاتقان اقتوبە قالاسىنىڭ باتىس-1, باتىس-2 جانە باتىس-3 شاعىن اۋداندارىن تۇراقتى اۋىز سۋمەن قامتاماسىز ەتۋگە باعىتتالعان»،– دەلىنگەن حابارلامادا.
سارىبۇلاق كەن ورنى وبلىس ورتالىعىنان 56 شاقىرىم جەردە ورنالاسقان. جوبا اياسىندا مۇندا 20 ارتەزيان ۇڭعىماسى بۇرعىلانىپ، قاجەتتى ينفراقۇرىلىممەن جابدىقتالماق. سونداي-اق توپتىق سۋ قۇبىرى سالىنىپ، جەلىلەر تۇرعىن ءۇي الاپتارىنا دەيىن جەتكىزىلەدى. قۇرىلىس جۇمىستارى بيىل باستالادى.
نىسان پايدالانۋعا بەرىلگەننەن كەيىن اقتوبە قالاسىنىڭ تۇرعىندارى، سونداي-اق العا جانە مۇعالجار اۋداندارىنداعى ەلدى مەكەندەر تاۋلىگىنە قوسىمشا 70 مىڭ تەكشە مەترگە دەيىن اۋىز سۋمەن قامتاماسىز ەتىلەدى. ونىڭ ىشىندە وبلىس ورتالىعىنىڭ قارقىندى دامىپ جاتقان اۋداندارىنىڭ ءوسىپ كەلە جاتقان سۇرانىسىن وتەۋ ءۇشىن تاۋلىگىنە 25 مىڭ تەكشە مەتر سۋ باعىتتالادى. سارىبۇلاق كەن ورنىنىڭ بارلانعان قورى ءوڭىردى الداعى 30 جىل بويى تۇراقتى اۋىز سۋمەن قامتاماسىز ەتۋگە جەتكىلىكتى.
ايتا كەتەيىك، 2024–2026 جىلدار ارالىعىندا ارناۋلى مەملەكەتتىك قور قاراجاتى ەسەبىنەن ۇكىمەت جالپى قۇنى 610 ملرد تەڭگەنى قۇرايتىن 500-دەن استام الەۋمەتتىك جوبانى قارجىلاندىرۋدى ماقۇلدادى. ولاردىڭ باسىم بولىگى بۇگىندە پايدالانۋعا بەرىلدى. ونىڭ ىشىندە جالپى قۇنى 226,5 ملرد تەڭگەنى قۇرايتىن 267 جوبا سۋ ينفراقۇرىلىمىن دامىتۋعا باعىتتالعان.
